Policia shqiptare ka marrë pjesë në operacionin ndërkombëtar ku është vënë në pranga një ri shqiptar që kërkohej për terrorizëm. Bëhet fjalë për kapjen e 29-vjeçarit Endri Elezi, i cili ishte shpallur në kërkim për sulmin terrorist në vitin 2016 në Nice të Francës. Dyshohet se Endri Elezi ka furnizuar me armë autorin e sulmit terrorist.
“Ky shtetas ishte shpallur në kërkim ndërkombëtar nga autoritetet franceze si bashkautor i sulmit terrorist të ndodhur në datën 14.07.2016, në bulevardin “Promenade des Anglais”, Nice, Francë, ku një person i identifikuar si Mohamed Lahouaiej Bouhlel, duke ngarë një kamion 19-tonësh, e ka drejtuar atë përmes turmës së njerëzve që po ecnin rrugës së bulevardit ku po zhvilloheshin festimet e pavarësisë së Francës, duke shkaktuar vdekjen e 86 personave dhe plagosjen e dhjetëra të tjerëve. Gjatë kontrollit në kamion janë gjetur armë dhe municione. Shtetasi Endri Elezi dyshohet si personi që ka furnizuar me armë autorin e sulmit”.
Sipas policisë, Endri Elezi për t’u shmangur kapjes ka ndryshuar disa herë emrin e tij, nga Endri Elezi në Juxhino Elezi, Xhino Elezi dhe përfundimisht në Endri Blliku.
Ai akuzohet nga autoritetet franceze për “Pjesëmarrje në grup kriminal, “Mbajtja pa leje e armëve dhe municioneve”, “Mbajtja pa leje e materialeve ushtarake”. Shqiptarit iu vunë prangat në Itali dhe mësohet se është në pritje të procedurave të ekstradimit drejt Francës.
/a.r
