Një konflikt për motive të dobëta nisur mes dy adoleshentëve, ka degraduar në përdorimin e mjeteve prerëse teksa njëri prej tyre ka mbetur i plagosur. Ngjarja ka ndodhur në shkollën e mesme në fshatin Baz të Matit, ndërsa konflikti ka nisur në ambientet e palestrës.
Alban Gjonaj është 17-vjeçari i plagosur në brinjë, i cili është transferuar me helikopter drejt Spitalit të Traumës në Tiranë për kurim të specializuar, i cili fatmirësisht ndodhet jashtë rreziku për jetën.
Autori është identifikuar si 18-vjeçari Donald Lepuri i cili tashmë ndodhet në ambientet e komisariatit.
Njoftimi i Policisë:
Dyshohet se plagosi me mjet prerës një 17-vjeçar, Policia identifikon dhe shoqëron autorin e dyshuar.
Sot, rreth orës 10.30, në ambientin sportiv të shkollës së mesme në fshatin Baz, dyshohet se gjatë një konflikti për motive të dobëta, shtetasi D.L., 18 vjeç, ka goditur me mjet prerës një 17-vjeçar, i cili është transportuar në spital për ndihmë mjekësore.
Falë veprimeve të shpejta dhe reagimit të menjëhershëm, shërbimet e Komisariatit të Policisë Mat bënë të mundur kapjen dhe shoqërimin në Komisariat të autorit të dyshuar të ngjarjes, shtetasin D.L.
Gjatë veprimeve të para hetimore lidhur me këtë ngjarje, rezulton se 2 shtetasit e përfshirë në konflikt nuk kanë pasur konflikte të mëparshme.
Gjithashtu, u gjet dhe u sekuestrua në cilësinë e provës materiale mjeti prerës që dyshohet se është përdorur gjatë konfliktit.
Grupi hetimor, nën drejtimin e Prokurorisë, vijon veprimet hetimore për të sqaruar rrethanat dhe dinamikën e plotë të ngjarjes.
