Trupi i viktimës, që humbi jetën në aksidentin e rëndë në aksin Shkodër-Lezhë, ka mbetur i bllokuar tek njëra prej automjeteve të aksidentuara.
Po punohet për nxjerrjen jashtë makinës të trupit të viktimës, i identifikuar si Altin Lulo.
Personat e tjerë të aksidentuar Mateo Luli, Laura Luli e Hilmi Shkrelaj u dërguan në spital dhe ndodhen nën kujdesin e mjekëve, jashtë rrezikut për jetën.
Mësohet se rreth orës 12:10 të mesdites së sotme (18 Gusht), kamioni me drejtues shtetasin me iniciale H. Sh. është përplasur me automjetin me drejtues Altin Lulon dhe më pas me automjetin me drejtuese shtetasen A. H.
Në vendngjarje shkuan forcat e policisë dhe kanë nisur hetimet për shkaqet e këtij aksidenti rrugor.
Njoftimi i policisë:
Shkodër/Informacion paraprak
Rreth orës 12:10, në aksin rrugor “Shkodër-Lezhë”, kamioni me drejtues shtetasin H. Sh. është përplasur me automjetin me drejtues shtetasin A. L. dhe më pas me automjetin me drejtuese shtetasen A. H.
Si pasojë e aksidentit ka humbur jetën një shtetas ende i paidentifikuar dhe janë dëmtuar 3 shtetas, të cilët janë në kujdesin e mjekëve, jashtë rrezikut për jetën.
Grupi hetimor vijon punën për zbardhjen e rrethanave të aksidentit.
