Jennifer Lopez ka rrëfyer detajet e ëmbla nga dasma e saj me Ben Affleck. Çifti i sapokthyer nga muaji i mjaltit, kurorëzoi në një dasmë të madhe dashurinë e tyre në prani të fëmijëve, miqve e familjarëve, ndryshe nga ceremonia private në Las Vegas.
Deri në ditën e dasmës asgjë nuk ka shkuar vaj, është shprehur këngëtarja,pasi gjatë gjithë javës kishte rënë shi, kishte patur vetëtima e bubullima dhe të gjithë ishin me dhimbje stomaku.
“E vërteta është se nuk dyshova kurrë. Gjithë javën ndjeva lehtësimin dhe sigurinë se ishim në duart e Zotit…”
Lopez iu drejtua altarit nën tingujt e “True Companion” nga Marc Cohn, një surprizë e Affleck për të pasi 20 vite më parë, kur u fejuan, të dy mendonin se ishte “kënga e përsosur për një dasmë”. Çifti i ri u shoqërua në altar edhe nga fëmijët e tyre, një moment për të cilin Jennifer tha:
“20 vjetët midis ëndrrave të rinisë dhe botës së dashurisë së të rriturve dhe familjes që ne përqafuam atë ditë, sollën më shumë në këtë martesë se sa mund ta kishim menduar. Ne nuk po martoheshim vetëm me njëri-tjetrin, ne po martonim këta fëmijë brenda një familjeje të re. Ata ishin të vetmit persona që ne kërkuam të dëshmonin për ne në dasmën tonë. Për nderin dhe lumturinë tonë, secili e bëri”.
Në dasmën përrallore që zgjati tre ditë dhe u mbajt në pronën e Affleck në Georgia, nusja zgjodhi tre fustane Ralph Lauren. Fustani i parë ishte me mëngë të shkurtra dhe për të u përdorën mbi 1000 shami dhe 500 metra copë të prera në fruda dhe të ngjitura me dorë pas fundit.
Të ftuarit morën në shtëpi çanta të personalizuara të stampuara me shkronjat “JB”. Bennifer shtoi një prekje më intime në to duke vendosur në rripat e tyre emrin e secilit prej të ftuarve që mori pjesë në ceremoninë luksoze.
Të gjithë të pranishmit që qëndronin në hotelin pranë morën kuti çokollatash të personalizuara, ndërsa në dasmë mungoi vëllai i Affleck, Casey. Megjithatë, pas ceremonisë ai i dërgoi Jennifer një mesazh të përzemërt duke e mikpritur në familje.
Pas dasmës, Jennifer njoftoi se çifti dhe të ftuarit festuan me një mëngjes të shijshëm dhe të vonë pranë liqenit, që ajo e dekoroi vetë.
“E gjitha kulmoi në këtë moment, një nga më të përsosurit e jetës sonë. Nuk mund të ishim më të lumtur. Ju uroj të gjithëve këtë lloj lumturie… atë të fituar me vështirësi që është më e ëmbël prej rrugëtimit që ndodhi para saj”, thotë Jennifer duke iu referuar historisë së tyre shumëvjeçare të dashurisë dhe shansit të dytë që pati.
/a.r
