Ka dështuar sërish seanca për dhënien e pretencës për bandën e Shullazit. Mësohet se pretenca është shtyrë për datën 2 tetor.
Ndryshe nga radhet e tjera ku mungonin prokuroret, kesaj radhe mungoi avokati.
Shkak për shtyrjen u bë mungesa e Aldo Tabakut, avokatit mbrojtës të Blerim Shullazit, për arsye shëndetësore. Mungesa e tij u konsiderua e qëllimshme nga Prokuroria, e cila kryesohej nga drejtuesja e Prokurorisë për Krimet e Rënda, Donika Prela dhe Gentian Osmani.
Në sallë të gjyqit nuk ndodhej asnjë prej të pandehurve, ndërsa jashtë ambienteve të Gjykatës së Krimeve të Rënda vihej re prezencë e madhe e forcave të policisë.
Pretenca është shtyrë disa herë dhe krijoi edhe ngërç në prokurori, për shkak të refuzimit të 10 prokurorëve për të marrë pjesë në shortin. Kjo bëri që Kryeprokurorja Arta Marku të niste një hetim disiplinor ndaj këtyre të fundit, ndërsa tre të tjerë u transferuan në rrethe.
Banda e Shullazit akuzohet për krijimin e grupit të strukturuar kriminal, kanosje për shkak të detyrës ndaj Mynyr Konit e Dhori Kules dhe shtrëngim me anë të kanosjes për dhënie pasurie kundër Ylvi Beqjes për ish-hotel “Vollgën” në Durrës. Shullazi rrezikon deri në 15 vite burg për akuzat, po ashtu edhe anëtarët e bandës; Gilmando Dani, Besmir Shullazi, Endrit Qyqja dhe Endrit Zela.
Ndërkohë, Ambasada amerikane reagoi pak orë para seancës, me një deklaratë në të cilën inkurajon prokurorët e guximshëm.
Reagimi i Ambasadës së SHBA-ve është dhënë pas interesimit të “Zërit të Amerikës” për situatën e krijuar në Prokurorinë e Krimeve të Rënda për çështjen “Shullazi”.
Ambasada thotë se, “populli shqiptar meriton një sistem drejtësie, ku policia dhe prokurorët qëndrojnë së bashku kundër kriminelëve”.
/a.ç
