Qeveria amerikane mbylli pjesën më të madhe të operacioneve të saj gjatë orëve të paratë mëngjesit të kësaj të mërkure (1 tetor), pasi përçarjet e thella partiake penguan Kongresin dhe Shtëpinë e Bardhë të arrinin një marrëveshje financimi, duke shkaktuar atë që mund të jetë një ngërç i gjatë dhe i mundimshëm dhe që mund të çojë në humbjen e mijëra vendeve të punës federale.
Mbyllja e qeverisë vjen pak orë pasi Senati i kontrolluar nga republikanët dështoi të miratonte një projektligj për shpenzimet qeveritare. Kjo është mbyllja e parë e qeverisë që nga viti 2018.
Republikanët fajësojnë ligjvënësit demokrat për refuzimin e mbështetjes së projektligjit të Partisë Republikane për të financuar përkohësisht qeverinë.
Kryetari i Dhomës së Përfaqësuesve, Mike Johnson, tha në një postim në X se: “Demokratët kanë votuar zyrtarisht për të MBYLLUR qeverinë.”
Nga ana e tyre demokratët kanë ngritur shqetësime në lidhje me shkurtimet e Trump në Qendrat për Kontrollin dhe Parandalimin e Sëmundjeve dhe Institutet Kombëtare të Shëndetit.
Drejtori i zyrës së buxhetit të Kongresit pak para mbylljes së qeverisë dha disa detaje mbi implikimet e mundshme financiare. Në letrën nga Phillip Sëagel, zyra vlerëson se 750,000 punonjës federalë mund të pushohen nga puna çdo ditë, me një kosto totale ditore prej rreth 400 milionë dollarësh (297 milionë paund).
Ai shton se ky numër i parashikuar i punonjësve të pezulluar mund të ndryshojë çdo ditë, pasi disa agjenci mund të pezullojnë më shumë punonjës sa më gjatë të zgjasë mbyllja, ndërsa të tjerat mund të kujtojnë disa punonjës të pezulluar fillimisht.
Anëtarët e Kongresit do të vazhdojnë të paguhen, pasi paga e tyre kërkohet nga kushtetuta amerikane.
“Efektet e një mbylljeje qeveritare në aktivitetin e biznesit janë të pasigurta dhe madhësia e tyre do të varet nga kohëzgjatja e një mbylljeje dhe nga vendimet e marra nga Administrata”, shtohet në letër.
Mbylljet e qeverisë në SHBA po bëhen gjithnjë e më të zakonshme. Vetëm në mandatin e tij të parë presidencial të Trump u regjistruan tre raste të tilla. Kjo përfshinte mbylljen më të gjatë në historinë amerikane, që zgjati 35 ditë.
Përpara Trump, rekordin e mbante Bill Clinton, me një mbyllje 21-ditore të qeverisë në vitin 1995, drejt fundit të mandatit të tij të parë si president. Republikanët kishin fituar kontrollin si të Dhomës së Përfaqësuesve ashtu edhe të Senatit në gjysmën e mandatit të parë të Clinton dhe donin të miratonin një buxhet që, ndër të tjera, kufizonte shpenzimet për Medicare.
Në mënyrë të ngjashme, Barack Obama duroi një mbyllje 16-ditore në vitin 2013 për shkak të legjislacionit të propozuar të kujdesit shëndetësor nga presidenti i atëhershëm.
Gjatë mandatit si president, Ronald Reagan, mbikëqyri më shumë mbyllje të qeverisë gjatë presidencës së tij – tetë të tilla të regjistruara gjatë dy mandateve të tij në vitet 1980. Megjithatë, të gjitha ishin relativisht të shkurtra – hendeku më i gjatë i financimit zgjati vetëm tre ditë.
