Shqipëria kishte bërë të ditur ndërtimin e një linje hekurudhore me Kosovën, por siç duket ka ndryshuar mendim. Synimi i radhës është ndërtimi i një linje hekurudhore me Maqedoninë.
Për pasojë, siç raportojnë mediat kosovare, projekti për hekurudhën Kosovë – Shqipëri, i programuar prej vitesh, nuk do të zërë vend në diskutimet e Samitit të Vjenës, ku gjashtë kryeministrat e vendeve të Ballkanit Perëndimor do të diskutojnë më 27 gusht për infrastrukturën rrugore që lidh kryeqendrat e rajoni.
Zyrtarët e të dyja shteteve edhe këtë vit kanë folur për këtë projekt dhe kanë dhënë zotimet për të bërë përgatitjet e nevojshme, me synimin që për të, të sigurohet mbështetje financiare nga Bashkimi Evropian.
Deri më tani, asnjëra prej qeverive të të dyja vendeve nuk ka bërë studim fizibiliteti për hekurudhën. Ministrat e transportit kanë përmendur më herët shumën prej rreth një miliard eurosh, si kosto e hekurudhës dhe patën shprehur besimin se gjysmën e mjeteve do të mund t’i siguronin nga BE-ja.
