Prokuroria e Tiranës në hetimet paraprake të saj duket se ka zbardhur motivin e ngjarjes së ndodhur pas mesnatës së 1 prillit në Tiranë.
Veprimi i kryer nga Desara Mançellari, e cila dogji makinën e nënës së ish-të dashurit, duke përfshirë në flakë edhe tri mjete të tjera, duket se ka qenë një mënyrë presioni.
Sipas Prokurorisë, nga hetimet e kryera dhe dëshmitë e marra gjatë hetimit paraprak, konfirmohet fakti se javën e fundit Filip Papajani, 21 vjeç dhe Desara Mançellari, 23 vjeçe, ishin ndarë pas një lidhje dashurie më se 10-mujore raporton Panorama. Ndonëse ende nuk dihet se cili ka qenë iniciatori i kësaj ndarjeje, ajo çka është e qartë është se Desara Mançellari ka kërkuar ta linin të qetë, por kjo nuk ka ndodhur.
Në dosjen e Prokurorisë, të paraqitur dje në Gjykatën e Tiranës, shpjegohej ngjarja siç ka ndodhur dhe jepej edhe versioni i prokurorisë në lidhje me shkakun e krimit. Ja si përshkruhet ngjarja nga ana e Prokurorisë.
ZJARRVËNIA
Sipas organit të akuzës, më datë 01.02.2016, në vendin e quajtur Rruga e Kokonozëve, janë djegur plotësisht dy mjete dhe dëmtuar nga zjarri dy të tjera. Mjetet e djegura plotësisht janë një “AUDI A4”, me targa AA xxx IA dhe një mjet tip rulotë me targa TR xxx N, në pronësi të shtetasit V.P.
Aty janë djegur pjesërisht edhe dy mjete të tjera, njëri me targa TR xxxx R dhe një kamionçinë pa targa. Nga hetimet e zhvilluara ka rezultuar se dy mjeteve të djegura plotësisht u është vënë zjarri në mënyrë të qëllimshme, duke u spërkatur me benzinë nga një person i cili është kapur nga një kamera sigurie.
Nga pamjet filmike duket një person me xhup me ngjyrë gri, tuta dhe atlete, që ka spërkatur mjetet dhe u ka vënë zjarrin atyre.
I DASHURI E PADITI
Desara Mançellari është sot në qeli pas padisë së bërë ndaj saj nga ish-i dashuri. Sipas akuzës, pas djegies së makinave, ka qenë shtetasi Filip Papajani që ka pasur dyshime se zjarri është vënë nga ish-e dashura e tij me të cilën ai ka pasur një lidhje dashurie, por që kohët e fundit ka qenë në krizë dhe me grindje të shpeshta.
Nga ana e Policisë është pyetur shtetasja Desara dhe ajo ka shpjeguar marrëdhëniet e saj me shtetasin Filip Papajani dhe familjen e tij, si dhe faktin se ata kanë qenë të lidhur e ma pas janë ndarë me njëri-tjetrin. Gjithashtu ajo shpjegon se pas ndarjes ka qenë nën presionin e shtetasit V. Papajani e Filip Papajani për ta vazhduar lidhjen.
PRESIONI NDAJ VAJZËS
Si pjesë e presionit që është ushtruar ndaj saj, Desara Mançellari në dëshmi përmend një takim me ish-të dashurin dhe babain e tij. Ata janë takuar e kanë ndenjur në një lokal, ajo me këta të dy dhe kushërira e saj, lokal në të cilin kanë ndenjur deri në orën 7 të mëngjesit. Gjatë qëndrimit në lokal, Desara Mançellari ka deklaruar se ka qenë nën presionin e tyre për t’u rilidhur me Filip Papajanin.
MOTIVI I NGJARJES
Pas takimit në lokal me 21- vjeçarin dhe të atin, vajza thotë se ka menduar që të frikësojë familjen e Filipit, me qëllim që t’i qëndronin asaj larg dhe për këtë arsye ka menduar të djegë makinën.
Ajo ka blerë benzinë në një pikë karburanti, lëndë të cilën e ka hedhur në një shishe dhe më pas ka shkuar pranë banesës së Filip Papajanit ku, pasi ka spërkatur me benzinë makinën tip “Audi”, i ka vënë asaj flakën me një shkrepëse.
Pas kësaj ka shkuar në banesën e saj dhe rrobat që kishte veshur i ka vënë në lavatriçe për t’i larë, ndërsa atletet në vendin e tyre në korridorin e banesës. Këto sende janë sekuestruar nga Policia Gjyqësore./Panorama
