Zbardhen detaje të reja në lidhje me ngjarjen e ndodhur dy ditë më parë, ku mbeti i vrarë 40 vjeçari Fatjon Sinani.
Sipas dëshmive pranë familjes së viktimës, atentatori i dyshuar, Neritan Qejvani ka shkuar në banesën e çiftit Sinani, duke u futur brenda, teksa dera ishte e hapur, ndërkohë që ata ishin ulur në tavolinë për të ngrënë darkë.
Vrasësi menjëherë i ka drejtuar pistoletën Sinanit dhe e ka qëlluar me 4 plumba. Një plumb e ka kapur në kokë, dy në gjoks dhe një në këmbë.
Gruaja e viktimës e ndoqi atentatorin
Vrasësi pasi e ka qëlluar është larguar me vrap për të dalë nga dera, ndërkohë e shoqja e Sinanit e ka ndjekur nga pas, por është rrëzuar dhe ka humbur ndjenjat.
Nga të dhënat e familjarëve, autori ishte i maskuar dhe armatosur, ndërkohë që ata kanë mohuar pistën se vrasja ka ndodhur për shkak të përfshirjes në veprimtari ilegale.
Vrasja për kanabis? Familja e mohon
Lajmet se ekzekutimi i Fatjon Sinanit në Vlorë dyshohet se mund të ketë lidhje me një konflikt për kanabisin, familja i mohon kategorikisht.
Ata shprehen se nëse do të merreshin me këtë gjë nuk do të jetonin në ato kushte dhe nuk do të hanin bukë me derën hapur, por do të ruheshin.
“Nuk e dimë kush e vrau, por nuk kemi pasur probleme dhe nuk jemi marrë me veprimtari ilegale, pasi nëse do të ishte ashtu, atëherë nuk do të hanim bukë me derën hapur” thanë familjarët e viktimës.
Hetohet pista e hakmarrjes nga Tropoja
Pista kryesore e hetimit lidhet me të kaluarën e viktimës në Tropojë, pasi Fatjon Sinani prej 10 vitesh ishte zhvendosur nga veriu në Vlorë.
Sinani ditët e fundit gjendej shpesh në sheshin “Omonia” të qytetit bregdetar ku kërkonte punë, ndërsa gruaja punonte si rrobaqepëse.
Fatjon Sinani u ekzekutua para dy netësh në banesën e tij në Vlorë, ndërsa policia pak minuta më pas arrestoi Neritan Qejvanin, personin e dyshuar si autor, por ky i fundit nuk ka pranuar të flasë.
/Shqiptarja
