Pas hapjes së debateve nëse në Shqipërinë komuniste ka pasur apo jo përdhunime të femrave të burgosura nga ana e zyrtarëve, një dëshmi tronditëse ka ardhur nga historiani Kastriot Dervishi.
Në librin e tij, “Kampet dhe burgjet e komunizmit”, autori flet për përdhunimin e një shtetase polake nga ana e Feçor Shehut, i cili më vonë do të bëhej edhe ministër i brendshëm i Shqipërisë.
“Më ka bërë përshtypje historia e polakes me emrin Barbara. Në moshën 18-vjeçare, në vitin 1960, ajo vjen në Durrës së bashku me bashkëshortin e saj, me të cilin pati studiuar në Poloni. Në vitin 1964, vihet nën presionet e Degës së Brendshme të Durrësit, drejtuesi i së cilës e ka përdhunuar”, thotë autori i librit për gazetën Panorama.
“Në vitin 1966 ajo njofton Ambasadën e Polonisë për sa i kishte ndodhur. Në vitin 1969, arrestohet dhe dënohet me 17 vite burg. Pasi vuan tre vjet e katër muaj në Kuçovë, shkon në Durrës. Bashkëshorti i parë e kishte braktisur.
Në këto kushte, pranon një martesë të dytë, ndërsa punon me tri turne në plastikën e Durrësit. Në vitin 1973, i bën një letër Enver Hoxhës për jetën e saj. Në raportin përmbledhës në lidhje me këtë letër, thuhet: “Pretendon se në tetor të vitit 1965, kryetari i Degës së Punëve të Brendshme, K.N., e merr me Gaz dhe bashkërisht shkojnë në një vilë në plazhin e Durrësit, ku do të vinin për takim me të dërguar nga Ministria e Brendshme.
Tha se me të hyrë në vilë, ku nuk kish asnjë njeri, K.N. kyçi derën, vendosi pistoletën mbi tryezë dhe gjysmë i zhveshur tentoi ta nënshtronte, por ajo u mbrojt. U paralajmërua prej tij të mos i thoshte kurrkujt për këtë ngjarje”.
Në këtë histori përfshihet edhe emri i Feçor Shehut, të cilin një kuadro tjetër e akuzonte për stilin e punës, imoralitetin e tij si dhe për një përdhunim që kishte kryer ndaj Barbarës. Për këtë kuadër, Feçori ishte ‘feminist, se i lyente flokët si gratë’”.
Historiani thotë edhe se më 1955, SHBA denoncoi në OKB raste konkrete të dhunës seksuale ndaj grave të dënuara në Shqipëri.
