Ministri i Transportit dhe Infrastrukturës Sokol Dervishaj, ka zhvilluar disa inspektime për të parë nga afër situatën e kalueshmërisë në zonën e Pukës.
Ndalesa e parë e Ministrit Dervishaj ishte një aksin Shkodër-Pukë, ku tha se ky aks është i hapur dhe nuk paraqet probleme pavarësisht situatës se krijuar nga reshjet e dëndura të dëborës dhe temperaturave që shkojnë deri në -20.
Ministri Dervishaj vijoi bashkë me deputetin Pjerin Ndreu, inspektimin e gjëndjes së kalueshmërisë dhe ndërhyrjen e firmave kontraktore në aksin Pukë-Tropojë, Qafa e Malit.
Ministri tha se është ndërhyrë dhe janë marrë masat e domosdoshme, çfarë ka bërë që rruga të mos jetë jetë e bllokuar në asnjë moment.
“Janë marrë të gjitha masat e duhura, dhe aktualisht nuk kemi asnjë aks kombëtar të bllokuar. Ministria në bashkëpunim me institucione të tjera, si policia e shtetit, ushtria, emergjencat dhe pushteti lokal, kanë marrë masat dhe reaguan në kohë. Aktualisht situata nuk është më problematike dhe po shkon drejt përmirësimit, por të mos harrojmë se jemi në kushte dimri, dhe sidomos drejtuesit mjeteve në disa zona duhet të kenë kujdes dhe të përdorin zinxhirë dhe goma dimri për automjetet”, tha ai.
Në lidhje me disa kritika ndaj firmave të mirëmbajtjes, Dervishaj sqaroi se “ne si Ministria e Transportit në përfundim të kësaj situate do të zhvillojmë një vlerësim të detajuar për mënyrën se si u përballua situata jo vetëm në transportin rrugor, por edhe në atë detar dhe të aviacionit civil. Por ajo që konstatoj dhe nga terreni, firmat kanë reaguar duke pastruar borën dhe hedhur sasi të mëdha kripe në rrugë. S’duhet të harrojmë se probleme me motin ka edhe në rajon dhe shtete të zhvilluara të Europës, prandaj është e rëndësishme që shteti të reagojë me masa, por edhe drejtuesit e mjeteve të tregohen të kujdesshëm”.
