By-passi i Fierit do të jetë gati në pranverën e ardhshme. Afati është përcaktuar nga ministri i Transportit, Sokol Dervishaj, pas inspektimit të punimeve. Dervishaj pohoi se projekti po ecën me ritme të përshpejtuara për të kompensuar vonesat nga ndërpreja e punimeve gjatë verës. Ai sqaroi se problemet janë zgjidhur dhe puna vijon normalisht.
“Kemi besimin e madh që ky projekt do të përfundojë në pranverën e ardhshme. Ka pasur problematika, por ajo që është esenciale është e rëndësishme për tu theksuar që këto problematika janë tejkaluar. Ky është një projekt nuk realizohet me para buxheti por me para donatorësh”, tha ministri.
Dervishaj pohoi se do i jepet zgjidhje dhe shqetësimit të banorëve të zonës për çështjen e shpronësimit.
“Kemi probleme të pazgjidhura ende për shkak të shpronësimeve të papaguara për banorët e zonës, disa prej të cilëve i takova dhe dua ti garantoj që do bëjmë maksimumin që ata të marrin të drejtën e tyre. Buxheti i shtetit ka pasur vështirësite e tij”.
By-passi i Fierit u ndërpre për disa muaj si pasojë e protestës së nënkontraktorëve që pretendonin se nuk ishin paguar prej muajsh nga firma kontraktore italiane.
Oranews/d.i.
