Ministria e Bujqësisë ka mbajtur premtimin e dhënë në lidhje me kompesimin e të gjithë fermerëve me lopë të cilat u prekën nga dermatoza nodulare pak kohë më parë.
Në këtë kuadër, Ministri i Bujqësisë Edmond Panariti i shoqëruar nga deputeti i Qarkut Taulant Balla dhe deputetja Monika Kryemadhi, janë ndalur këtë të premte në Mjekës, ku kanë shpërndarë 80 lopë ndërsa numri total i lopëve të ngordhura në qarkun e Elbasanit është 288.
Ministri Panariti tha se “ deri në muajin prill në të gjithë vendin do të përfundojë kompensimi i fermerëve me lopët e humbura në të gjithë vendin. Lopët janë lopë të racës të çertifikuara dhe të importuara nga Danimarka, me një rendiment mesatar prej 20 litrash qumësht në ditë. Lopët që u dëmtuan jepnin mesatarisht 8 litra qumësht në ditë, që do të thotë ne po zëvëndësojmë dy lopë të dëmtuara po të nisemi nga rendimenti. Ky është një premtim i dhënë dhe i mbajtur, dhe më pas ne në këtë zonë do të vazhdojmë me investime të tjera të fuqishme siç është stacioni i mekanikës bujqësore që do të jetë një risi i cili do të pasohet në të gjithë vendin, si edhe futjen e kulturave të tjera në bujqësi”.
Nga ana e tij, deputeti Taulant Balla tha se , “po konkretizohet dhe në qarkun e Elbasanit një program që zhvillohet për herë të parë në Shqipëri pas një problematike që hasën një pjesë e fermerëve, për shkak të një sëmundje të gjedhit. Pas 25 vjetësh, në Shqipëri qeveria kompenson plotësish çdo dëm që u është shkaktuar fermerëve, siç ishte kjo e këtij viti ku fërmerët humbën një prej pasurive më të mëdha.
Të gjitha familjet e dëmtuara do të kompensohen. Sot 80 familje morën lopët e tyre, konkretisht 29 në Elbasan, 30 në Librazhd dhe bashkitë e tjera. Jam i sigurtë që qeveria do të vazhdojë angazhimin e plotë në sektorin e bujqësisë, sepse jo vetëm kompensimi është i rëndësishëm, por gjithashtu është i rëndësishëm përmirësimi i rracës së gjedhëve në Shqipëri. Lopët që po shpërndahen sot kanë një rendiment shumë të lartë, gati dyfish, krahasuar me rendimentin e lopëve vendase dhe do t’i kërkojmë Ministrisë së Bujqësisë që ky projekt të vijojë edhe më tej”.
Ndërsa deputetja Monika Kryemadhi shpërndarjen e lopëve në zonën e Mjekësit e cilësoi si hapin e parë të ndërrmarë nga Ministria e Bujqësisë. Ajo tha se,“ nuk qëndron problemi vetëm në zhvillimin e blegtorisë, por përsa i përket të gjithë qarkut të Elbasanit dhe sidomos zonës së Dumresë, bëhet fjalë për kultivimin e kulturave alternative që janë të domosdoshme, sidomos në këtë qark me kaq shumë fusha dhe me një zhvillim bujqësor i cili ka mbetur disi i prapambetur.
“Ne jemi duke punuar për një strategji shumë interesante e cila shumë shpejt do të prezantohet. Kemi diskutuar dhe me profesor Panaritin për të rritur një kulturë tjetër e cila është shumë më e shtrenjtë, shumë më e kultivueshme, e cila është shafrani, ku Dumreja është një zonë eksperimentale dhe të ardhurat janë të mëdha”, tha deputetja Kryemadhi.
