Ministria e Bujqësisë bëri të ditur se sëmundja e dermatozës nodulare që preku gjedhët në vendin tonë disa muaj më parë, është rikuperuar plotësisht me sukses dhe në fund të muajit shkurt, të gjitha kafshët e regjistruara si të dëmtuara nga dermatoza, do të kompensohen kokë më kokë.
“Tashmë, ne e kemi mposhtur virusin e dermatozës nodulare dhe nuk kemi asnjë rast të ri”, tha për ATSH-në, drejtori i Shërbimit Veterinar në Ministrinë e Bujqësisë, Edi Ferro.
Sipas tij, pas një periudhe intensive të vaksinimit të gjedhit dhe kontrollit rigoroz në të gjitha fermat e vendit, nga veriu e deri në jug të Shqipërisë, dermatoza nodulare u vu nën kontroll të plotë.
Aktualisht, ministria e Bujqësisë po punon për kompensimin e premtuar ndaj fermerëve dhe blegtorëve, kafshët e të cilëve u dëmtuan nga sëmundja e dermatozës nodulare. Shumë shpejt do të bëjmë kompensimin e kafshëve të dëmtuara.
Ndërkohë shpjegon ai, është bërë porosia në Danimarkë me kafshë të rracës, të përzgjedhura, të cilat janë edhe me cilësi rracore më të mirë sesa kafshët e dëmtuara dhe sipas një plani të hartuar mirë, do të bëhet urgjentisht kompensimi për fermerët e dëmtuar.
Sipas tij, kafshët që do të vijnë nga Daminarka do të mbahen në regjim karantine, e cila do të jetë pranë Qendrës së Transferimit të Teknologjive Bujqësore në Fushë-Krujë dhe deri në fund të muajit shkurt pritet që ato të mbërrijnë, për t’u shpërndarë më pas në të gjithë vendin, aty ku ka pasur të dëmtuara nga dermatoza./a.k
