Nga Flogert Muça
Është i paprecedent në historinë e politikës shqiptare diskretitimi që i bëhet figurës së gruas nga çadrën e Partisë Demokratike. Kemi parë në këto 26 vite demokraci doktor Berishën që të quajë lavire e kurva të gjitha gratë dhe vajzat që i kanë dalë përpara në rrugën e tij politike ose ekonomike. Kemi parë dhe dëgjuar se si ministrat e tij i shihnin gratë e vajzat vetëm si objekt seksual dhe se si lodheshin me mbërtheckat që nuk hapeshin (rasti Pango).
Kemi parë poashtu se si Basha për 4 ditë me radhë nxorri ca gjimnaziste të sulmonin kundërshtarët e tij politikë nga selia blu. Gjimnaziste të cilat nuk e dinin për çfarë po flisnin, ama lexonin fletë-rrufetë që kishte prodhuar dora e burrave. Burra të cilët po shfrytëzonin pa mëshirë ca adoleshente për të bërë politikën e ditës, duke i përdorur ato si “kukulla seksi “.
Mirëpo, përpos të gjithë këtyre Partia Demokratike sot publikisht ka keqtrajtuar një grua deputete. Arbjola Halimi, deputetja e qarkut të Elbasanit ka degjeneruar sot në çadrën e ngritur në Bulevard me një fjalor tërësisht të denjë për vendin ku ishte, pra në rrugë. Duke dashur të sulmojë Ramën, por pa patur ndonjë argument që të mbush mendjen, Halimi ishte porositur sot nga burrat e partisë që të dilte dhe të fliste për dëshirat e supozuara seksuale të kryeministrit Rama. Fjalët e hedhura nga Arbjola sot nuk ishin asfare fjalët e saj, por skenari i përgatitur nga burrat e PD-së për të sulmuar sot Ramën.
Në ditën e 28 të ngujimit në çadër, Partisë Demokratike i kanë shteruar idetë dhe afër mendsh edhe argumentat për të bërë oponencë. Ndaj dhe ka menduar të nxjerrë një grua që të sulmojë Ramën për shijet seksuale, si pika fundore e çdo debati real dhe si tregues i kapsllëkut total që e ka zënë opozitën.
Ky keqpërdorim i pamëshirshëm që ju bë sot një gruaje është në fakt vazhdim i një tradite 26-vjeçare në Partinë Demokratike. Për të, gratë që dalin nga linja dhe nuk bëjnë ç’ju thuhet, konsiderohen armike (Majlinda Bregu). Ndërsa gratë e tjera që tentojnë të bëjnë punën e tyre jashtë PD-së, qofshin politikane, biznesmene apo gazetare, etiketohen si lavire ose ndrikulla.
Ky perceptim që ka Partia Demokratike për gratë dhe vajzat ka bërë që në atë çadër të flasin vetëm burrat. Duke lënë të kuptohet se protesta behët vetëm për hallet e ca burrave e asgjë më tepër. Dhe në këtë pikë janë të vërtetë 100%. Gratë në atë parti nuk kanë asnjë vlerë dhe për to nuk ngrihet asnjë kauzë, duke treguar se ato shihen si vegla momentale dhe asgjë më shumë. Deri kur do vazhdojë kjo sjellje ndaj grave në PD? A do ngrejë kokë grupi i deputeteve demokrate ndaj këtij keqpërdorimi që ju bëhet vajzave dhe grave në PD? Mbetet për tu parë.
