“Forumi Kombëtar Serb” ka shtrirë aktivitetin e vet edhe në Kosovë, në kuadër të dialogut të brendshëm, i cili ka nisur prej disa muajsh në Serbi. Delegacioni udhëhiqet nga Nikola Selakoviq, sekretar i përgjithshëm i presidentit të Serbisë, Aleksandër Vuçiq, dhe zëvendësdrejtori i “Zyrës për Kosovë dhe Metohi”, Dushan Kozarev, shkruan Koha Ditore .
Misioni i zbarkimit dyditor në Kosovë është organizimi i tryezave të rrumbullakëta për të ashtuquajturin “dialog për zgjidhjen e çështjes së Kosovës dhe Metohisë”. Autoritetet e Kosovës nuk kanë treguar nëse ky aktivitet dhe të tjerat po bëhen me lejen e tyre. Ministria e Punëve të Brendshme ka thënë se kjo është kompetencë e Ministrisë së Punëve të Jashtme. Kjo e fundit, por as Zyra e kryeministrit Ramush Haradinaj nuk kanë treguar nëse vizita dhe dialogu po bëhen me lejen e tyre.Për njohësit e rrethanave vizitat e tilla nga Beogradi janë provokim dhe nuk duhet lejuar nga institucionet e Kosovës.
Selakoviq, pati një përgjigje që rrallë herë dëgjohet nga politikanët në pushtet nga Beogradi.
“Kur u përmend demarkacioni me Malin e Zi, mua më erdhi në mendje fakti se me Maqedoninë, kjo është kryer tash e sa vjet. Edhe atëherë dikush e ka përkrahur këtë gjë, ndërsa tani po flitet që të tjerët most a përkrahin. Kjo është e çuditshme”, ka thënë Selakoviq, transmeton Klan Kosova.
Në këtë takim është përmendur edhe shitja e tokave nga serbët e Kosovës, gjë për të cilën Selakoviq tha se kjo gjë ka ndodhur edhe në kohën sa Serbia ka pasur sovranitet në Kosovë, e lëre më që tashmë nuk ka sovranitet mbi Kosovën. (b.an)
