Derbi, Mihajlovic i shkruan Mancinit: Kush humb, paguan për refugjatët
Trajneri i Milanit i ka bërë një propozim të veçantë kolegut të Interit nëpërmjet një letre të publikuar sot në “Gazzetta dello Sport”. “Kush do të fitojë derbin do të paguajë duke shkuar në ndihmë të refugjatëve dhe nëse dalim barazim do ta dyfishojmë shumën”, i ka shkruar Mihajlovic trajnerit të Interit.
Letra
“Gjithmonë kam falënderuar ata që në jetën time më kanë dhënë mundësinë të shpreh cilësitë e mia njerëzore dhe profesionale. Ndihem një njeri me fat, për sa kam bërë deri tani. Për ëndrrat e kthyera në realitet. Dhe një pjesë të këtyre gëzimeve i kam marrë në Milano ku kam mbyllur karrierën time si lojtar dhe kam filluar atë si trajner. Të kesh mundësinë të luash derbin në këtë qytet, në fillim si futbollist dhe tani si trajner, e konsideroj një privilegj të madh, një krenari, një medalje që mund ta vë në gjoks me krenari. Këtë do t’ia them edhe lojtarëve para ndeshjes së të dielës. E bëjmë këtë profesion për të jetuar mbrëmje të tilla, në një stadium si ‘San Siro’, përballë tifozerive të zjarrta si ato të Milanit dhe Interit. Një ditë, duke parë mbrapa, mes momenteve që do të më vijnë në mend, do të jenë edhe këto. Për këtë arsye, kam menduar se do të ishte bukur, për mua që kam jetuar dhe jetoj edhe tani këtë privilegj, t’i kthej diçka mbrapsht këtij qyteti, të paktën dy herë në vit, në ditët e derbit, ditët kur zemra e Milanos rreh në ‘San Siro’. Dhe të ndihmoj ata që, në këtë qytet, nuk kanë qenë aq me fat sa ne. E di se dy klubet bëjnë shumë për solidaritetin. Kjo e imja është vetëm një nismë personale dhe një ‘sfidë e zemrës’ që ia bëj atij që si unë nga Milano ka marrë shumë, mikut dhe kundërshtarit tim, Roberto Mancini”.
