Është kthyer në një ritual që para një derbi drejtuesit të mbajnë fjalime dhe të premtojmë shpërblime. As Refik Halili nuk mund të bënte përjashtim.
Mesditës së djeshme, pak para se ekipi të konsumonte drekën në hotelin ku ishte grumbulluar Tirana, është shfaqur presidenti. Ai ka mbledhur grupin dhe për afro 30 minuta ka komunikuar me ta, duke i dhënë mbështetjen dhe moralin e duhur para ndeshjes me Partizanin.
“Është një ndeshje shumë e rëndësishme kjo. Pjesa më e madhe e juaja e ka të qartë, ndërsa të tjerët janë informuar. Duhet fituar. Ju mund t’ia dilni dhe këtë e keni vërtetuar duke bërë lojëra të mira, sikundër ishte ajo ndaj Kukësit. Kini besim te forca juaj dhe vlerat që mbartni. Nëse kjo ndodh, atëherë rezultati që të gjithë presin do të vijë. Duhet t’ia dalim edhe për tifozët”, mësohet se u ka thënë fillimisht kreu i klubit futbollistëve.
Më tej, ai është ndalur te financat, duke i dhënë garancinë e duhur grupit për paratë.
“Garancia financiare do të jetë prioriteti ynë për këtë sezon. Asgjë nuk do të humbasë”, tha ai. Në fund, u ndal edhe te shpërblimi, nuk u ndal në shifra, megjithatë konkretisht u shpreh: “Është bërë adet edhe për premio. Ndaj të jeni të sigurt se me një fitore, shpërblimet s’do mungojnë”.
Derbi i madh i kryeqytetit asnjëherë nuk ka kaluar pa shpërblime. Edhe pse ekipet e kanë detyrë fitoren, presidentët gjithnjë janë treguar zemërgjerë. Dëshira për të festuar kundër rivalit të përjetshëm i detyron në një lloj forme që të hapin “thesin”. Dhe shifrat pritet që të zbardhen para ndeshjes, ose në fund të saj, shkruan panorama.
Megjithatë është e paevitueshme që bardheblutë të “mbushin xhepat” nëse mposhtin “demat”. Kur janë bërë 9 derbe pa fitore, e sigurt është që jo vetëm drejtuesit, por edhe dashamirës të Tiranës mund të vendosin premio.
