Interi ka përmbysur rezultatin ndaj Juventusit për të fituar në fund 2:1
Interi i Frank de Boer ka fituar derbin e Italisë ndaj Juventusit, duke i mposhtur kampionët me rezultat 2:1, për t’ia shkaktuar kështu humbjen e parë në Serie A këtë edicion, përcjell Gazeta Express.
Interi dhe Juventusi kanë dhuruar spektakël në ndeshjen që u zhvillua në ‘Giuseppe Meazza’. Edhe përkundër rasteve të shumta në pjesën e parë, skuadrat shkuan në pushim me rezultatin 0:0.
Spektakël dhuruan edhe në pjesën e dytë, ku kësaj radhe gjetën rrugën drejt portave. Të parët në epërsi kaluan ‘Zonja e Vjetër’. Golin për 0:1 e shënoi mbrojtësi Stephan Lichtsteiner në minutën 66’të.
Por, dy minuta më vonë, Mauro Icardi barazoi rezultatin në 1:1 për ta ndezur edhe më shumë këtë sfidë.
Pas tentativave të njëpasnjëshme, erdhi edhe goli i fitores për Interin. Ivan Perisic, i cili hyri në lojë në minutën e 69’të, shënoi golin e fitores në minutën e 78’të, për rezultatin përfundimtarë 2:1.
Kështu Interi ia shkakton humbjen e parë ‘Zonjës së Vjetër’ për këtë sezon në Serie A. /Express/
