Lidhur me numrin e madh të reagimeve të qytetarëve rreth problemeve me të dhënat e pasakta në Listën zgjedhore, përfaqësuesit e organizatës joqeveritare “Civil” thonë se nuk janë edhe aq shumë të habitur nga kjo dukuri, sepse kanë qenë të vetëdijshëm se në Listë, gjenden shumë njerëz që s’duhet të jenë pjesë e kësaj liste.
“Kjo për ne nuk është ndonjë befasi. Që në vitin 2013 kemi thënë se në Listën zgjedhore, mbi 100 mijë votues janë votues fantomë ose i janë bashkangjitur listës në mënyrë kriminale”, tha kryetari i “Civil”-it Xhabir Deralla.
Deralla thekson se nëse ekipi i ekspertëve i Komisionit Shtetërorë i Zgjedhjeve ka thënë se deri në muajin prill mundet ta pastrojë Listën e zgjedhore, atëherë ata duhet t’i lëmë ta bëjnë këtë punë.
