Deputeti i PD-së, Gent Strazimiri, rrezikon të dënohet me 10 vite burg “për armë mbajtje pa leje” me një ligj të deputetit të PD-së dhe ish- ministër të Drejtësis, Eduard Halimi. Në mars të vitit 2013 Kuvendi i dominuar nga PD-ja miratoi ndryshimet në Kodin Penal që, sipas ministrit të Drejtësisë të asaj kohe, Eduard Halimi do të mundësote “zbrapsjen e krimit urban dhe mbi të gjitha do ketë efekt parandalues të kriminalitetit”. Halimi e mbrojti ligjin në Kuvend me argumentat se sa i përket armëmbajtjes pa leje, neni 287 i Kodit Penal është ndryshuar si vijon “mbajtja e armëve, municionit luftarak, i bombave apo minave, ose lëndëve plasëse në automjete apo çdo mjet tjetër të motorizuar, në ambiente publike ose në ambiente të hapura për publikun, pa lejen e organeve kompetente shtetërore, dënohet me burgim jo më pak se dhjetë vjet”. Strazimiri është në kushtet flagrante të shkeljes së ligjit për armëmbajtje pa leje, gjë që vërtetohet nga dhjetra pamje. Vepra penale e tij është akoma më flagrante pasi ai ka shkuar me armë në një protest duke qenë një rrezik potencial si për policinë ashtu edhe për protestuesit.
