Shtëpinë e ekstremistit grek, Kostandinos Kaçifa, e ka vizituar edhe deputeti i Lëvizjes Socialiste për Integrim, Vangjel Tavo.
Në një video të publikuar nga mediat greke, mamaja e 35 vjeçarit, Vasilia, i kërkon ndihmë atij për sjellen në shtëpi të trupit të djalit të saj.
Unë e dua sa më shpejt këtu. Pse e mbajnë atje? Pse nuk qajnë të gjithë? E justifikoj tim bir. Nuk bëri asgjë, vetëm vendosi pesë flamuj në fshat. Djali im ishte besimtar me kryq në qafë, me lutje posht jastëkut. Nuk kam frikë asgjë. Fshatrat tona u shkatërruan Vangjel. Marrin para nga shqiptarët dhe japin dëshmi të shtrembërta. Për ç’arsye Vangjel? Vangjel përse fshatrat tona u bënë kështu? Nuk duhet të ishim një grusht, një grusht.
Duke u shprehur se e kupton dhimbjen që ndjen e ëma për të birin e vrarë, deputeti i LSI-së, Vangjel Tavo, thotë se ekstremisti grek nuk kishte për qëllim të vriste njeri.
Po, po e besoj dhe e kuptoj dhimbjen! Nese do të donte ta bënte, do ta kishte bërë. Kacifas nuk donte të vriste njeri. Nuk di cfarë të them… Të vetmen gjë që dua bëj thirrje të vijë trupi i djalit në shtëpi. Sa më shpejt.
Bashkë me Vangjel Tavon ka qënë edhe eurodeputetja greke, e cila i premtoi mamasë së Kaçifas që çështjen e tij do të ngrejë edhe në Bruksel.
Konstandin Kacifas u vra nga RENEA ditën e diel pas shkëmbimit të zjarrit me policinë, pasi nuk pranoi që të dorëzohej. Ai fillimisht hapi zjarr ndaj policisë lokale në Gjirokastër më pas u arratis në malin e Bularatit ku u vra.
Ngjarja ka shkaktuar tension mes Shqipërisë dhe Greqisë, ndërsa trupi i ekstremistit ndodhet në morgun e QSUT në Tiranë për ekspertizë të detajuar. (Shqiptarja.com)
