Deputetët e opozitës kanë bllokuar foltoren e kuvendit. Të mbledhur të gjithë rreth saj, deputetët e PD-së janë çuar të gjithë në këmbë dhe nuk po lejojnë zhvillimin normal të seancës.
Pas një mbledhje të deputetëve të PD-së, kreu i grupit Edi Paloka tha se nëse maxhoranca nuk miraton ndryshimet e sjella nga opozita për dekriminalizimin, nuk mund të ketë më parlament. Paloka tha se duhet që të miratohet menjëherë amendimi i opozitës për dekriminalizimin, që bën të mundur largimin e deputetëve apo zyrtarëve që janë akuzuar për krime kundër jetës. Kreu i grupit të PD-së tha se nuk mund të vijohet me prezencën e kriminelëve si ai i Armando Prengës në parlament.
“Deputeti i tij Armando Prenga përgjaku me armë disa qytetarë, pranë komisariatit të policisë. Opinioni publik dhe mbarë europa e bota u tronditën. E sule këtu në sallë, e sule në komisione që të ushtronte dhunë, me grushta dhe me rrip kundër deputetëve të opozitës. E shpërbleve me Lagunën e Patokut dhe kur ai përgjaku komisariatin, e shpëtove disa orë më pas. Duhej t’i jepje duart atij deputeti, por nuk e bërë kurrë. Nuk i tradhëtojmë dot ne qytetarët e vendit. Ne kemi ngritur një kauzë të madhe, bashkë me partnerët ndërkombëtare, dekriminalizimin e opozitës, por prapë, Rama na sjell këtu plagosjen, gjakëderdhjen, armën pa leje. Jo Edi Rama. Ky parlament nuk funksionon më kështu. Ose vendosim të ecim pa krimin ose nuk ka më seancë në këtë parlament. Kalo tani propozimin tonë që pezullon të zgjedhurit dhe funsionarët që janë akuzuar për kërcënime për jetën. Me krimin dhe korrupsionin, me shkeljen e kushtetutës për xhepat e deputetëve të tu, kështu nuk mund të ketë parlament më. Kushtet që shpalosim nuk janë një tekë e jona, por kthimi i normalitetit.”- tha Paloka.
Ish kryetarja e Parlamentit Jozefina Topalli tha se sot nuk bo të zhvillohet seanca parlamentare.
“Më mirë është qi zoti Rama të ikësh prej aty edhe ti Leskaj, dhe të vijnë Armandot aty”- tha demokratja.
