Kreu i qeverisë mblodhi ministrat dhe deputetët në një darkë të organizuar në fshatin Surrel të Tiranës, fshat ky ku Rama tashmë është banor.
Burime nga mbrëmja e organizuar bëjnë të ditur se takimi është zhvilluar nga kreu i PS me qëllim që t’i falenderojë të tijët për mbylljen e sesionit parlamentar dhe fitoren e zgjedhjeve.
Të pranishëm në darke mësohet të kenë qenë të gjithë deputetët me përjashtim të Ben Blushit. Gjithashtu të pranishëm nuk kanë qenë as ministrat e LSI, aleate kryesore kjo e socialistëve në qeverisje dhe zgjedhje.
Darka është hapur nga deputeti i zonës, Xhemal Qefalia dhe pas tij ka folur Rama, ndërsa më herët ky i fundit ka kërkuar që pjesëmarrësit të konfirmonin prezencën e tyre në darkën e Surrelit.
Tavolinat kanë qenë të vendosura buzë pishinës, ndërsa nuk kanë munguar batutat e Ramës me pjesëmarrësit.
I pari ka qenë deputeti Pandeli Majko i cili i është drejtuar Ramës duke e cilësuar si banor të fshatit dhe se i takon atij t’i respektojë rregullat për dollitë.
Rama ka falenderuar kryesisht kryetarët e Komisioneve Parlamentare, ndërsa kjo mësohet të ketë qenë edhe mbledhja e fundit e socialistëve gjer në shtator që rinis puna.
