Problemet më të mëdha në Shqipëri janë korrupsioni i përhapur në të gjitha degët e qeverisë, por veçanërisht në sistemin e drejtësisë dhe të shërbimit shëndetësor, dhuna në familje dhe diskriminimi ndaj grave.
Ky është vlerësimi që jep raporti vjetor i Departamentit amerikane të Shtetit për gjendjen e të drejtave të njeriut, i bërë publik të mërkurën. Pandëshkueshmëria është një prej problemeve të tjera me të cilat përballet Shqipëria, sipas raportit.
“Ndjekjet ligjore dhe sidomos dënimet e zyrtarëve që kanë kryer shkelje kanë mbetur sporadike dhe të paqëndrueshme. Zyrtarët, politikanët, gjykatësit dhe personat me lidhje të fuqishme biznesi shpesh kanë mundur t’i shpëtojnë ndjekjes penale,” nënvizon raporti. Qeveria filloi hetimet për disa zyrtarë të nivelit të lartë, por prokuroria më pas vendosi t’i pushojë këto çështje”, thuhet në kapitullin për Shqipërinë.
Raporti konstaton mbylljen e çështjen e gjyqtarit të gjykatës apelit dhe anëtar i Këshillit të Lartë të Drejtësisë, të cilin prokurorët e akuzuan në vitin 2014 për pasuritë e fshehura, deklaratë të rreme, falsifikim të dokumenteve, pastrim parash dhe korrupsion. Raporti përmend se krimi ne nivele te larta mbetet i pandëshkuar kjo për shkak te frikës se prokuroreve nga hakmarrja, mungesa e burimeve por dhe korrupsioni brenda gjyqësorit.
Një numër agjencish qeveritare referuan raste korrupsioni, por burimet e kufizuara, rrjedhje e informacionit dhe presioni politik pengoi hetimet. Ministria e drejtësisë njoftoi se dënimet nga gjykatat e rretheve u ulen me 36.8% në krahasim me 2014.
Ligji parashikon aksesin ne informacionet e qeverisë por ky ligj duket se nuk është zbatuar në mënyrë efektive nga vete qeveria. Si probleme të tjera shqetësuese për Shqipërinë përmenden dhuna e ushtruar nga policia dhe keqtrajtimi i të dyshuarve gjatë periudhës kur ata mbahen të ndaluar dhe merren në pyetje; po ashtu evidentohen rastet e mbajtjes për një kohë të gjatë të të pandehurve në qendrat e ndalimit, pa u ngritur akuzat, si dhe kushtet jo normale nëpër burgje.
Në raport përmendet fakti që Shqipëria vazhdon të jetë burim dhe destinacion i trafikimit të qenieve njerëzore për shfrytëzim seksual dhe për punë të detyruar.
