Një video e publikuar nga Departamenti amerikan i Drejtësisë duket se tregon Jeffrey Epstein duke u përpjekur të kryejë vetëvrasje në qelinë e tij. TMZ raporton se videoja e tregon qartazi.
Videoja daton më 10 gusht 2019, dita kur financieri pedofil u gjet i vdekur në qelinë e tij në Manhattan ndërsa priste gjyqin për akuzat e trafikimit seksual.
Departamenti i Drejtësisë nisi të publikonte dosjet e redaktuara Epstein të premten dhe duket se videoja u është bashkëngjitur dokumenteve.
Departamenti i Drejtësisë ka sqaruar se redaktimet janë bërë për të mbrojtur privatësinë e viktimave dhe për të shmangur ekspozimin e materialeve të ndjeshme, duke theksuar se “nuk po fshihen emrat e politikanëve”. Megjithatë, shumë dokumente janë të redaktuara rëndë, gjë që ka ngritur dyshime mbi transparencën e procesit.
Departamenti ka identifikuar mbi 1 mijë e 200 viktima ose të afërm të tyre dhe ka mbajtur materiale që mund t’i ekspozonin. Por fakti që disa dosje u hoqën nga faqja zyrtare pa shpjegim ka shtuar skepticizmin.
Vdekja e Epstein është veshur me teori konspirative pasi shumë njerëz nuk besojnë se ai u vetëvra. Autoritetet deklarojnë se shkaku i vdekjes së tij ishte akti i vetëvrasjes, por vëllai i financierit, Mark, beson se ai u vra.
Në dosje ka edhe fotot të tijat me vajza të vogla dhe pamje nga ‘strofulla’ e tij.
Në to shfaqen edhe personazhe të njohur si Bill Clinton, Kevin Spacey, Walter Cronkite, Michael Jackson, Diana Ross, Mick Jagger, Chris Tucker, David Copperfield etj.
Autoritetet theksojnë se përfshirja e këtyre emrave nuk do të thotë se ata kanë kryer ndonjë vepër penale.
Shumica e tyre kanë mohuar çdo lidhje me krimet e Epstein.
Sipas Departamentit të Drejtësisë, qindra mijëra faqe të tjera janë ende në proces shqyrtimi dhe pritet të publikohen në javët në vijim.
