Një 45 vjeçare shqiptare në New York, menaxhere e një zyre do të gjykohet nën akuzën se ka mashtruar me licencën e saj duke u shtirur si dentiste kur dentisti i vërtetë nuk ka qenë në zyrë.
Lajmi bëhet i ditur nga mediat amerikane sipas të cilave pacientë të shumtë janë ankuar dhe kanë denoncuar veprimet shqiptares Valbona Yzeiraj , pasi ajo u ka nxjerrë dhëmbët apo kryer shërbime të tjera stomatologjike duke u shkaktuar lëndime serioze.
Sipas autoriteteve amerikane dentistja kurrë nuk kishte ndjekur studimet për stomatologji. Mediat amerikane bëjnë të ditur se Dr. Val siç njihej shqiptarja nuk ishte e autorizuar të ushtronte profesionin e dentistit. Sipas hetimeve, Yzeiraj ishte menaxherja e laboratorit të dentistit dr. Xhefri Shongold.
Kur ky i fundit nuk ndodhej në punë, ajo vishej si dentiste dhe priste pacientë të ndryshëm. Këtë detyrë të paautorizuar ajo e ka ushtruar nga nëntori 2012 deri në gusht të vitit 2013.
“Ajo diagnostikonte pacientët, bënte rreze x, si edhe u injektonte atyre anestezi deri të mbushjet e dhëmballëve”, ka thënë në gjyq asistenti i dentistit, Patrik Mekadën.
45 vjeçarja shqiptare madje kishte krijuar edhe klientelën e vetë duke kryer punë me pacientët pa dijeninë e dentistit. Kjo e bëri mjaft popullore dhe të njohur shqiptaren në Bronks.
Dyshimet e para lindën kur një pacient pati komplikacione dhe shqetësime lidhur me dhëmbët. Ndërkohë disa të tjerë nisën të kishin infeksione orale dhe dhimbje në dhëmballë. Pas zbulimit, dentisti e shkarkoi nga detyra Yzeirajn. Por kjo e fundit sipas hetimeve u përpoq t’i grabiste xhiron e ditës, kur iu komunikua shkarkimi.
Nëse ajo shpallet fajtore, rrezikon deri në 7 vjet burg. Por edhe nëse shpallet e pafajshme, ajo do të paguajë 20 mijë dollarë dëme të shkaktuara. Yzeiraj ka emigruar në SHBA në vitin 2003.
Redaksia Online
(Javanews.al)
