Një automjet civil me fenelina si ato të policisë ka tërhequr vëmendjen e një patrulle policie në Tiranë. Verifikimi i mëtejshëm ka zbuluar se pronari i saj, nuk kishte asnjë lidhje me policinë. Drejtuesi i mjetit, Emilian K. është proceduar penalisht për akuzën e “mbajtjes pa të drejtë të uniformës” raporton Panorama.
Dosja në ngarkim të tij mbërriti në gjykata, ku pak ditë më parë ai u deklarua i fajshëm dhe u dënua me gjobë në shumën 100 mijë lekë të reja. “Me datë 05.11.2016 rreth ores 19.30, në rrugën ‘Jordan Misja’, gjatë një kontrolli të ushtruar nga shërbimet Policisë së Komisariatit Nr.3, në automjetin e Emilian K. u gjetën te montuara dy fenere (ndriçues) si ato fenelinat që përdor policia, dhe një sirenë të montuar sipër motorrit me zhurma si ato që përdor policia. Në rastin konkret është përdorur duke i montuar në makinën e tij shenja dalluese, që tregojnë cilësinë e një punonjësi qe kryen nje detyrë shtetërore apo një shërbim publik, (dy fenerë ndriçues me ngjyra blu dhe të kuqe si fenelinat e policise dhe një sirenë me zhurma që përdor policia).
Gjatë hetimeve paraprake, i pyetur në cilësinë e personit ndaj të cilit zhvillohen hetimet, i pandehuri Emilian K. e ka pranuar faktin se kur policia e ka kontrolluar ka gjetur te vendosura në makinë një sirenë dhe dy fenere si ato të policisë. Ai ka pretenduar ka blerë në dyqan dhe atje ku i ka blerë shitësi nuk i ka treguar se këto nuk lejohen, por as ai nuk e ka pyetur për një gjë të tillë. Ai sqaron se fenerët dhe sirenat i ka vënë vetë dhe i ka blere ne nje dyqan ne Burrel, per shumen 50 mije leke te vjetra, por nuk e ka ditur qe jane te ndaluara per ti vendosur ne makine./a.m.
