Gjykata e Lartë e Kasacionit dhe Drejtësisë në Rumani ka dënuar me 3.5 vite burg nën akuzën e korrupsionit, kreun e Partisë Social Demokrate, Liviu Dragnea.
Dragnea, i cili është po ashtu kryetari i Parlamentit rumun apeloi vitin e kaluar, pasi Gjykata e Shkallës së Parë e kishte dënuar për shpërdorim detyre, por kërkesa e tij nuk u pranua.
Ai është dënuar për shkak të një afere ku është përfshirë edhe partia e tij. Ai ka punësuar dy gra në Qendrën e Mbrojtjes Sociale dhe të Fëmijëve, ndërkohë që ato në të vërtetë punonin për partinë dhe jo për detyrën që u ishte ngarkuar. Dëmi në buxhet llogaritet 23 mijë euro.
Po ashtu, mbi Dragnea rëndon edhe një dënim i mëparshëm për manipulim votash.
