Ish kreu i Shoqatës së Prokurorëve, Shkëlqim Hajdari, paralajmëroi pesë vite më parë pasojat e funksionimit të Reformës në Drejtësi.
Dënimi i sotëm i ish-Kryeprokurorit Lallla me dy vite heqje lirie dhe pesë vite përjashtim nga funksionet publike dhe politike për pesë vite, duket se i ka dhënë të drejtë parashikimit të ish Kreut Prokurorisë së Apelit, i cili deklaroi se reforma do të nxirrte në pah pasuritë e paligjshme të pjestarëve të drejtësisë dhe hetimit.
Si erdhi dorëheqja
Vetëm pak muaj pasi prokurori i përgjithshëm, Adriatik Llalla, e transferoi nga drejtues i prokurorisë së apelit në prokuror të thjeshtë në Shkodër (në dhejtor 2015), Hajdari kërkoi dorëheqjen e tij nga organi i akuzës. Ai deklaroi në atë kohë se dorëheqja e tij ishte pasojë e situatës në organin e akuzës, të cilën ai e kosnderoi “alarmante për një shtet demokratik”. Ai akuzoi drejtuesin e prokurorisë se emërimet dhe shkarkimet i bënte në shkelje të ligjit dhe në favor të personave të paaftë. Madje, sipas tij, disa elementë në institucionin e prokurorisë po kontrolloheshin nga krimi i organizuar dhe nga korrupsioni dhe po përdoreshin nga politika.
“Dorëheqja ime nuk është një akt dorëzimi, përkundrazi, është një akt i përgjegjshëm sensibilizimi dhe motivimi të prokurorëve të ndershëm, të cilët në sistemin e prokurisë janë në maxhorancë. Për fat të keq, prokurorët nuk munden dot të artikulohen dhe të gjejnë forca për të ndaluar këta individë, të cilët nëpërmjet shkeljes së hapur të ligjit, përdorimit politik dhe kriminal të tyre e kanë katandisur organin e akuzës në një organ, i cili vetëm zbatimin e ligjit nuk bën më” – tha kryetari i shoqatës së prokurorëve në qershor të vitit 2016 në një intervistë për “Zëri i Amerikës”, me gazetarin Iliran Agolli.
Zoti Hajdari tha se një numër jo i vogël prokurorësh profesionistë nga krimet e rënda dhe sektorë të tjerë ishin transferuar në mënyrë të paligjshme nëpër periferi dhe pikërisht në zonat ku janë përballur me bandat e armatosura.
Parashikimi për reformën
Ai paralajmëroi, se situata e krijuar në organin e akuzës mund të rregullohej vetëm nëse do të niste funksionimin reforma në drejtësi.
“Reforma do të nxjerrë pasuritë e mëdha të disa prokurorëve, lidhjet me krimin të disave madje edhe lidhjet me Sigurimin e Shtetit të disa të tjerëve”, tha Hajdari.
Ai akuzoi në atë kohë Këshilli e Prokurorisë, si një “vegël qorre, që shkel ligjin në mënyrë të vazhdueshme”. Sipas tij, këshilli i atëhershëm ishte bërë një mashë për të shkatërruar prokurorë të ndershëm, të cilët kishin punuar me ndershmëri, përkushtim, e që nuk kishin pranuar kurrë të përdoren politikisht gjatë karrierës së tyre.
Ndërkaq, Prokuroria e Përgjithshme deklaronte në atë kohë se transferimet e prokurorëve ishin bërë në kuadër të ristrukturimit të institucionit dhe sektorëve të ndryshëm të tij./ b.h
