Kreu i Forumit Shqiptar në Malin e Zi, Nik Gjeloshaj, ka reaguar pas vendimit të Gjykatës Speciale ndaj ish-krerëve të Ushtrisë Çlirimtare të Kosovës, duke e cilësuar atë si një vendim “jashtëzakonisht të padrejtë”.
Përmes një reagimi publik, Gjeloshaj shprehet se kjo ditë mund të jetë “ditë zie për shqiptarët”, por thekson se qëndrimi i të akuzuarve dhe besimi te procesi i apelimit duhet t’u japë forcë shqiptarëve për të përballuar këtë situatë.
“Ky është vendim i shkallës së parë dhe procesi gjyqësor nuk ka përfunduar”, shkruan Gjeloshaj, duke shtuar se beson që në përfundim të procesit do të dëshmohet pafajësia e të akuzuarve.
Ai ka mbrojtur gjithashtu karakterin e luftës së UÇK-së, duke e cilësuar atë si “vetëmbrojtëse, çlirimtare dhe të drejtë”, ndërsa ka theksuar se lufta ishte për lirinë dhe pavarësinë e Kosovës.
Gjeloshaj nënvizon se ish-krerët e UÇK-së i janë përgjigjur drejtësisë ndërkombëtare dhe nuk janë larguar apo fshehur.
“Shqiptarët dhe vetë të akuzuarit i kanë respektuar institucionet ndërkombëtare. Ata as nuk kanë ikur, as nuk janë fshehur, por janë paraqitur para drejtësisë dhe do ta vazhdojnë betejën e tyre ligjore deri në fund”, shprehet ai.
Në reagimin e tij, Gjeloshaj përmend edhe figurën e Adem Jasharit dhe rolin që, sipas tij, UÇK-ja dhe Shtetet e Bashkuara të Amerikës kanë pasur në rrugën drejt lirisë dhe pavarësisë së Kosovës.
Kreu i Forumit Shqiptar ka reaguar edhe ndaj një deklarate të mëparshme të tij, për të cilën thotë se është nxjerrë nga konteksti.
“Nuk ia vlen të komentohet nxjerrja e një deklarate sime nga konteksti dhe manipulimi me të”, shkruan Gjeloshaj, duke sqaruar se diskutimi, sipas tij, kishte qenë për respektimin e vendimeve të gjykatave ndërkombëtare.
Në fund, ai sjell në vëmendje edhe rastin e gjeneralit kroat Ante Gotovina, duke kujtuar se ai ishte shpallur fajtor në shkallën e parë dhe më pas ishte liruar në apel.
“Besojmë deri në fund; beteja për drejtësi vazhdon!”, e përfundon reagimin e tij Nik Gjeloshaj.
