Flamurtari do të luajë nesër kundër Kukësit, në stadiumin e Kamzës, për llogari të javës së 11-të të Superiores. Të mërkurën, trajneri Ilir Daja ka marrë një lajm të keq, sepse Komisioni i Disiplinës ka pezulluar motorin e mesfushës kuqezi, Idriz Batha. Pikërisht në këtë pikë ka qenë më së shumti i përqendruar trajneri i Flamurtarit në konferencën e sotme për shtyp, sepse kot nuk thonë: gjuha vete ku dhemb dhëmbi…
“Kukësi ka bërë më mirë se ne deri në këto momente, por kemi një bonus ndaj tij. Në ndeshjen direkte të fazës së parë, ne kemi marrë fitore. Do të luajmë në transfertë, por në një fushë asnjanëse, që do të thotë se të tria rezultatet janë brenda ndeshjes së nesërme.
Duhet të tregojmë atë lojë, që zhvilluam në pjesën e parë ndaj Teutës. Ndeshja me tifozë është gjithmonë më e mirë, edhe nëse ata mbështesin vetëm ekipin kundërshtar. Dua të mendoj anën positive: prania e tifozëve është motivuese, qofshin këta edhe me kundërshtarin, në rastin konkret me Kukësin.
Dënimi me pamje filmike i Bathës? Nuk e di çfarë mund të ndodhë deri në momentin e ndeshjes. Ne kemi punuar gjatë gjithë javës me Bathën në formacion, por tani nuk e kemi, meqë e dënoi Disiplina. Do ta ndiejmë shumë mungesën e tij. Më mirë të presim orarin e ndeshjes për të parë se cili do ta zëvendësojë nga ata që kemi në dispozicion.
Disiplina nuk mund të marrë vendim me pamje filmike, sepse aty kanë qenë të gjithë arbitrat. Sepse në këtë mënyrë i bie që edhe neve të na heqin tre kartonë të verdhë, që i kemi marrë pa të drejtë. Nëse përdorim pamjet filmike, Veliut duhet t’i hiqet kartoni, sepse nuk e ka prekur fare kundërshtarin.
Nuk mund të merren vendime të tilla nëpër zyra mbi vendimet e gjyqtarit.
Objektivat tanë? Edhe pse presidenti e thotë gjithmonë që duhet të kënaqim me futboll publikun vlonjat, synimi ynë është të luajmë në “Europa League”. Pra, të renditemi të paktën në vendin e tretë, ose të katërt të Superiores në fund të kampionatit”.
/b.d
