Gjykata e Tiranës ka dënuar me burg një 43-vjeçare, të akuzuar për “plagosje të rëndë me dashje” të një tjetër femre.
Sipas Gjykatës, e pandehura Merita Topi është autore e plagosjes me thikë të shtetases Elvira Ç.
Në përfundim të gjykimit, e pandehura Merita Topi u dënua me 3 vjet heqje lirie. Ajo përfitoi uljen e një të tretës së këtij dënimi për shkak të gjykimit të shkurtuar. Referuar vendimit të Gjykatës, konflikti mes dy femrave është shënuar në 9 nëntor të vitit të kaluar në rrugën para banesës së të pandehurës, në zonën e Kombinatit, në kryeqytet.
Fillimisht, ato janë konfliktuar me fjalë me njëra-tjetrën dhe më pas, e pandehura ka kaluar në veprime fizike, duke e qëlluar me një mjet të mprehtë.
Në deklarimet e saj para oficerëve të Policisë Gjyqësore, e pandehura ka pohuar se ditën e ngjarjes ajo po përgatiste drekën, kur para shtëpisë së saj ka kaluar e dëmtuara, e cila e kishte ofenduar me fjalë të ulëta, si k… e të tjera.
Sipas të pandehurës, siç ishte me një thikë në dorë, me të cilën po qëronte patate, ka dalë te dera e banesës dhe e ka pyetur se përse e shqetësonte.
Referuar deklarimit të Topit, e dëmtuara ka vijuar ta fyejë me të njëjtat shprehje. Në këtë moment ajo i është afruar dhe e ka qëlluar në krah me thikë.
Më tej ajo ka rrëfyer se konfliktin me Elvira Ç. e kishte që prej vitit 1997 dhe se për vite me radhë ofendohej e ngacmohej prej saj. Gjatë gjykimit e pandehura ka shfaqur pendesë për veprën e kryer.
Panorama
