Ministrja e Ekonomisë dhe Financave Anila Denaj po merr pjesë në Samitin e Investimeve për Ballkanin Perëndimor të organizuar nga BERZH, në Londër ku diskutohen projektet e përbashkëta rajonale për zhvillimin e Ballkanit.
“Me Kryeministrin Edi Rama, në Samitin e Investimeve për Ballkanin Perëndimor , të BERZH, për të folur për Ballkanin si një treg të përbashkët rajonal, një treg që tërheq investitorë të rinj dhe që sjell risi për të gjitha ekonomitë e vendeve tona”- shprehet Denaj.
Denaj thekson se, programet kryesore të ndërlidhjes tashmë në zhvillim dhe projektet e reja infrastrukturore kanë angazhimin maksimal të Qeverisë Shqiptare, si një instrument zhvillimi dhe integrimi ekonomik në rajon dhe Europë.
Duke u ndalur në takimin me Presidentin e BERZH-it, Denaj thotë se, ” i shprehëm mirënjohjen për mbështetjen e vazhdueshme ndaj qytetarëve Shqiptarë”.
“Qeveria Shqiptare është e angazhuar t’i bëjë realitet projektete rajonale edhe përmes unifikimit të procedurave dhe reduktimit të burokracive dhe bashkëpunimit me Bashkimin Evropian dhe Bankën Europiane për Rindërtim dhe Zhvillim”- shprehet Denaj.
/a.r
