Gentian Malindi, pronar i një anijeje peshkimi, akuzon policinë Kufitare të Durrësit se në mënyrë të përsëritur i ka shkaktuar dëm ekonomik e moral, shkruan Gazeta Shqiptare. “Policia e Kufirit po ushtron kontrolle të vazhdueshme të përsëritura e pa arsye konkrete. Kontrollojnë për drogë në anijen time. Vijnë 20 punonjës policie dhe po më persekutojnë. Nuk jam kundër kontrollit, por jo atij me kosto ekonomike në xhepin tim!”, tha dje 41-vjeçari për “GSH”.
Ndërkohë, burime nga policia pohuan se Malindi (me profesion jurist) është i skeduar si i dyshuar për trafiqe të paligjshme dhe për këtë arsye mbahet nën vëzhgim.
Malindi thotë se dje anija e tij iu nënshtrua dy kontrolleve. I pari ishte para daljes në det ndërsa një orë më pas anija u rrethua në det të hapur nga dy skafe të policës kufitare, të cilët kërkuan kthimin në port.
“Sapo u kthye anija, pashë 10 punonjës policie me qen antidrogë. Vetëm pamja ishte e tmerrshme. Kthyen gjithçka përmbys, kontrollonin në çdo cep. Nga prania e qenve kuptova se kërkonin drogë në anijen time. Ata e kishin kontrolluar anijen kur u nis për gjueti. Kjo është padrejtësi dhe abuzim nga ana e policisë, pasi po më dëmtojnë biznesin”, thotë Malindi.
“Pasi na kthyen nga rruga dhe na mbajtën nën terror deri në orën 12:30, policët u mjaftuan vetëm me një ‘na falni për rrëmujën që ju bëmë”. Por, nuk do ta lë me kaq këtë punë. E para, ka kosto ekonomike, pasi anija del në det të hapur, lundron një apo dy orë e kthehet mbrapsht. Gjithashtu, na prish imazhin. Ne jemi taksapagues të rregullt, paguajmë taksa, detyrime, sigurime shoqërore, ndaj për këtë do padis policinë në prokurori”.
BW
