Mëngjesin e kësaj të marte, 9 dhjetor 2025, në Greqi janë arrestuar gjashtë persona, katër prej të cilëve shqiptarë, lidhur me një atentat ndaj një biznesmeni grek, Giannis Lalas, ky i fundit i cili ndërroi jetë nga një atentat tjetër në shtator të këtij viti.
Sipas mediave greke, shqiptarët e arrestuar dyshohen të kenë kryer një nga atentatet e kryera ndaj Lalas, ngjarje e ndodhur në maj të këtij viti.
Një prej të arrestuarve shqiptarë, me nofkën “Demos”, ka një të kaluar të errët, mes atentateve dhe vrasjeve. “Demos”, besohet të jetë një hallkë e rëndësishme e një grupi të strukturuar kriminal që funksionon në shtetin fqinjë, të quajtur “Mafia Greke”.
“Demos” mendohet të ketë pasur dhe rolin kryesor në një nga atentatet e kryera ndaj Lalas. Sipas raportimeve greke, ai ka qëlluar me breshëri plumbash nga motori i tij, drejt makinës ku ndodhej Giannis Lalas, por ky i fundit arriti të shpëtojë falë blindazheve të automjetit të tij. E gjithë kjo ngjarje ndodhi në pikën e karburantit të vetë biznesmenit. Që pas këtij atentati, Lalas qarkullonte me kujdes dhe lëvizjet e tij u bënë më të kufizuara, nga frika e një sulmi tjetër.
Nuk dihet nëse atentati i fundit i bërë ndaj Lalas, që rezultoi e në vdekjen e tij, të ketë lidhje me Demosin, por autoritetet helene nuk mendojnë një gjë të tillë, pasi biznesmeni ka pasur disa “armiq”.
Mes akuzave për vrasjen e një gazetari, boksieri dhe përfshirje në kontrabandë karburanti, kush ishte Giannis Lalas
Giannis Lalas, një biznesmen grek, por personazh mjaft i njohur në botën e errët të krimit.
I përfshirë në ndërmarrje me pika karburanti, Lalas dyshohej për “zhvatje” dhe kontrabandë të lëndës djegëse. Po kështu, ai njihej për grindje të shumta me persona të grupeve kriminale greke.
Përveçse këtyre, Lalas ka pasur precedent penal lidhur me organizimin e vrasjes së një gazetari investigativ grek, Giorgos Karaivaz, ngjarje kjo e ndodhur në prill të vitit 2021. Giannis Lalas dhe vëllai i tij, u arrestuar për vrasjen e gazetarit, por për shkak të mungesës së provave ata u liruan.
E njëjta gjë vlen dhe për vrasjen e një boksieri grek, Haris Kontogiorgis, në korrik të vitit 2024. Lalas u dyshua si i përfshirë në vrasjen e sportistit, por kjo gjë nuk u provua dot, ndaj dhe u la i lirë sërish.
Por, përveçse pikave të karburantit, duket se Lalas dëshironte të hynte të biznesin e kontrabandës së cigareve, për shkak se pak para se ai të vdiste, kishte nisur marrëdhënie të ngushta me një organizatë kriminale ruse në Greqi, e quajtur “Entik”. Ky grup, është në konflikt me grupet kriminale greke për kontrollin e kontrabandës së cigareve në shtetin fqinjë.
Më 1 nëntor 2025, Giannis Lalas u vra në Arahova, në dhomën e hotelit ku ai qëndronte. Ka qenë një person, i cili ka hyrë në dhomë me forcë dhe ka lëshuar breshëri plumbash ndaj 41-vjeçarit.
Në një distancë jo shumë të largët nga hoteli, u gjet dhe një automjet i djegur, që besohet se i përket autorit/eve.
Për autoritetet greke, vrasja e tij shihet si “larje hesapesh”, për shkak se Giannis Lalas, kishte informacion të tepërt për botën e krimit në Greqi.
