Sulejman Demollari, një nga figurat emblematike të futbollit dhe të kombëtares shqiptare gjatë viteve ‘80, në një prononcim për Javanews shprehu një “BRAVO” të madhe për të gjithë ekipin kombëtar shqiptarë, që u kualifikua në Francë 2016. Sipas tij, ky kualifikim është i mrekullueshëm në disa plane pasi: së pari, ka ngritur më lart prestigjin kombëtar; së dyti ka gëzuar shqiptarët kudo që janë; së treti, e ngre në majat më të larta të Europës futbollin shqiptar.
“Është një arritje e mrekullueshme, historike. Një BRAVO e madhe për të gjithë duke filluar që nga ekipi e deri tek Federata, që nga Presidenti Duka e deri dhe tek magazineri më i thjeshtë i ekipit kombëtar” shprehet Demollari. Sipas tij, kjo arritje kulminante mbart brenda mundin dhe djersën e brezave të tërë futbollistësh e trajnerësh, që vit pas viti “vunë nga një gur” në ngrehinën e futbollit shqiptar. “Më vjen mirë që dhe ëndërrat tona gjejnë pasqyrim në këtë fitore” shprehet Demollari.
Ish futbollisti i kombëtares nga ana tjetër kërkon që ekipi shqiptarë të vijojë të jetë me “këmbë në tokë”, pasi sfidat e europianit në Francë janë mjaft të forta dhe shumë komplekse. Sipas tij, është ende herët për të bërë një parashikim se si do të jetë ecuria në grupe e ekipit kombëtarë, pasi çdo gjë do të zbardhet kur të hidhet shorti që do të përcaktojë grupet. “Futbolli sot është në një fazë zhvillimi që smund të krahasohet me vitet ‘80. Është gjithnjë e më vështirë të bësh parashikime. Gjithsesi, për momentin, le të shijojmë shijen e këtij kualifikimi, pa harruar se sfidat e ardhshme janë akoma më të vështira”, shprehet Demollari për Javanews.
