Rreth 130 anëtarë të degës së Partisë Demokratike të Korçës, me rreth 2.500 anëtarë, kërkuan anulimin e procedurës për zgjedhjen e kryetarit të kësaj partie.
Në një peticion publik të firmosur prej tyre thuhet se farsa e nisur nga zoti Basha duhet të deklarohet absolutisht e pavlefshme, përfshirë aktet e nxjerra nga kryetari dhe nënkryetarët, që cilësohen si akte anti-statutore.
Peticioni e bën fajtor Lulzim Bashën për atë që e quan “disfata më e rëndë në historinë e Partisë Demokratike”.
Në të thuhet se, “shqiptarët nuk i falën PD-së inkoherencën në qëndrime dhe tradhtinë e kauzës opozitare pas marrëveshjes së paqartë dhe okulte me Edi Ramën”.
Të 130 firmëtarët e peticionit nga dega e Korçës thonë se zgjedhjet e kanë çuar opozitën në prag të asgjësimit, prandaj kërkojnë një garë të barabartë.
Përndryshe ata paralajmërojnë se zgjedhjet farse, të imponuara dhe konfliktuale mund të çojnë, më e pakta, në garë dhe opozitë formale dhe më e shumta, në një ndarje të re politike e pasoja afatgjata për opozitën. /tch/b.d
