Sëmundjet kardiovaskulare po shfaqen gjithnjë e më shpesh edhe tek moshat e reja, duke u kthyer në një shqetësim serioz për shëndetin publik. Ekspertët paralajmërojnë se faktorë si obeziteti, ushqyerja e pashëndetshme dhe mungesa e aktivitetit fizik po ndikojnë ndjeshëm në rritjen e rasteve të hipertensionit tek fëmijët.
E ftuar në emisionin “Shije Shtëpie”, këtë të martë, më 16 qershor, mjekja kardiologe Ëngjëllushe Hasani pohoi se nga analizat globale të viteve 2024-2025, hipertensioni tek fëmijët është dyfishuar krahasuar me dy dekada më parë.
Sipas mjekes edhe pse shumë herë neglizhohet procesi i matjes së tensionit arterial tek fëmijët, Shoqata Europiane e Hipertensionit rekomandon matjen e tensionit që në moshën 3 vjeçare.
“Sigurisht që janë aparatura të vogla dhe jo vetëm një matje tregon që fëmija vuan nga tensioni. Bëhet matje një-javore, dy herë në ditë dhe për të vlerësuar në mënyrë të saktë. Atëherë standarti i artë është matja ambulatore e presionit arterial, e cila bëhet nëpërmjet holterit të tensionit. Kjo gjë nuk aplikohet dhe nuk artikulohet fare në vendin tonë. Janë gjëra të reja por ne duhet të kthejmë gjithmonë vëmendjen nga fëmijët. Këto janë sëmundje pa shenja.”
Një tjetër alarm i ngritur nga mjekja lidhet me konsumin e lartë të sheqerit në dietën e fëmijëve, i cili sipas saj po ndikon drejtpërdrejt në shtimin e problemeve kardiovaskulare që në moshë të hershme.
“Dëmin po e bën sheqeri i cili gjendet kudo. Nuk duhet të harrojmë pijet që konsumojnë fëmijët dhe ato janë kategorikisht të ndaluara sepse përmbajnë rreth 45% fruktozë. Sipas kongresit të fundit për hipertensionin tek fëmijët rekomandohet moskonsumimi i asnjë produkti me sheqer dhe nëse do të dëshirojnë diçka pë t’u ëmbëltuar, rekomandohet vetëm mjalti.”
Hasani vuri theksin edhe tek edukimi shëndetësor, duke nënvizuar rëndësinë e kontrolleve të hershme edhe tek fëmijët në rastet kur kanë ndodhur ngjarje kardiake të rënda brenda familjes.
“Risku minimizohet duke ulur peshën, duke mbajtur nën kontroll yndyrnat sepse nuk e kemi në kulturë të bëjmë një analizë yndyrnash tek një fëmijë. Tek një fëmijë obez do të rekomandoja dhe matjen e yndyrnave, matjen e insolino-rezistencës sepse të gjithë këto faktorë kombinohen me njëra-tjetrën, nxisin stresin oksidativ dhe rrisin të gjithë faktorët që çojnë në hipertension që më vonë sjellin ngjarje kardiake.”
Ajo paralajmëroi gjithashtu se përdorimi i duhanit, drogërave apo edhe kontraceptivëve në moshë të hershme duhet të monitorohet me kujdes, pasi mund të ndikojë negativisht në shëndetin e zemrës në të ardhmen.
Kardiologia theksoi se një stil jetese i shëndetshëm mbetet mbrojtja më e mirë për fëmijët. Sipas saj, gjumi i plotë, aktiviteti fizik i rregullt dhe shmangia e ushqimeve të dëmshme janë elementët kryesorë për një zhvillim të shëndetshëm dhe për parandalimin e sëmundjeve kardiovaskulare që në moshë të vogël.
