Nga Ben Andoni
Pas orësh, muajsh e gati tre vitesh, Demarkacioni me Malin e Zi është kaluar në Parlamentin kosovar me limitin e votave të mundshme. Një votim maratonik, që mori jetë vetëm në tentativën e pestë për ta hedhur në votim. Deri më aty një debat shumë i gjerë në parlament, që vazhdoi pafundësisht dhe përfundoi si zakonisht në Kosovë me ofendime dhe me gazin lotsjellës.
Por, që para pak javësh, nënshkrimi i Demarkacionit ishte thjesht çështje procedure. Mungonin pak vota, që me sa duket janë peshkuar në konjukturat e shumta që janë në Kosovë. Fatmir Limaj duket se ka bërë punën në terren. Në këtë proces nuk është se kemi parë ndonjë interferim të Shqipërisë, në aspektin pozitiv, sepse me sa duket spektri kosovar është gjithnjë e më larg atij shqiptar.
Mali i Zi u duk se bëri një tërheqje taktike, që rezultoi thjesht si e tillë me votimin e fundit. Votimi mori jetë pas takimit të fundit të presidentit të Kosovës, Hashim Thaçi dhe atij të Malit të Zi, Filip Vujanoviq. Ata dolën me një deklaratë të përbashkët sipas së cilës parashihej formimi i një trupi të përbashkët punues me përfaqësues të Malit të Zi, që do të korrigjonin. I gjithë problemi mbeti preçizimi i vijës kufitare dhe korrigjimet e nevojshme në Çakorr e Zhlep, për të cilën malazezët u ulën disi. Mu këtë kërkuan dje me të drejtë anëtarët e Vetëvendosjes që e mbushën me tym parlamentin, por ndryshe nga të tjerët: Ta korrigjojmë dhe pastaj ta votojmë. Anipse kjo nuk u mor parasysh. Arsyetimi i madh i opozitës qëndronte i patundur në faktin se Kosova po humbte 8 mijë hektarë tokë. Për kapitalin e vet politik këtë e përdori edhe tanimë kryeministri aktual, Ramush Haradinaj që kur erdhi në pushtet që në ditën e parë të punës shkarkoi komisionin për shënimin e kufirit duke emëruar Shpejtim Bulliqin si udhëheqës të ekipit të ri, por që paradoksalisht përfundoi pothuaj në të njëjtën hulli.
Mbase nuk është vendi për të treguar se asgjë e veçantë nuk u provua me komisionin tjetër, madje nuk u mor as në konsideratë, me mirëkuptim nga të gjitha palët në Komisionet parlamentare. Kështu mbeti Marrëveshja e Demarkacionit ndërmjet Kosovës dhe Malit që u firmos në Vjenë më 26 gusht të vitit 2015 nga atëherë ish-Ministri i Jashtëm Hashim Thaçi, si edhe ish-Ministri i Brendshëm, Skënder Hyseni.
Po pse vallë duhej të harxhoheshin tre vjet për një gjë që tek e fundit nuk lëvizi aq shumë dhe nuk pati ndryshimet e duhura për të cilat u bënë aq fjalë? Pse u anatemuan aq shumë njerëz dhe u debatua për kartën nacionale por tek e fundit, të gjitha u zbehën? Pse nuk harxhohet e gjithë kjo energji njësoj për gjetjen e mënyrave për uljen e nivelit të varfërisë? Për të gjitha ka një përgjigje: Kosova dhe Shqipëria për shkak të formimit të tyre politik do vazhdojnë të humbasin gjithnjë energji të kota.
E nëse nuk do të ishte presioni i faktorit të huaj për Demarkimin dhe përmendja e vazhdueshme e liberalizimit të vizave, presioni amerikan dhe vendeve të Quint-it, Kosova do të vazhdonte të zvarritej në qerthullin e saj të pakuptimtë.
Demarkacioni i Kosovës për Evropën është hapi i parë dhe më vendimtari ndaj pak orë më parë Avramoupulos dhe Mogherini e përshëndetën dhe dhanë sinjalet e para, sepse më pas mbetet edhe lufta kundër krimit dhe korrupsionit, por për këto dy të tjera Bashkimi Evropian do mbylli sytë. Nuk ke çfarë t’i marrësh më Kosovës, përveçse t’i japësh pak oksigjen. Nga ana tjetër i duhet të respektojë disi kredibilitetin e politikanëve kosovarë që e premtuan Demarkacionin dhe e lidhën realisht me vizat. Shqipëria ndihmoi me sa mundi, kryesisht në aspektin politiko-diplomatik por edhe në këtë rast u pa se ndikimi i saj në Kosovë është gjithnjë e më i pakët, sepse problemet e saj e kanë treguar që Shqipërisë i duhet shumë të bëjë për demokratizimin e vet e pastaj ta eksportojë atë.
Kështu kaluan gati tre vjet, muaj dhe orë, derisa Parlamenti i Kosovës vendosi për Demarkacionin, që në fakt nuk i prishte asgjë dhe s’ka asnjë lloj ndikimi për të përveç premtimit të liberalizimit të vizave dhe që e gjitha do të harrohet krejt pas tre ditësh. Po, kështu, ndodh shpesh mes shqiptarësh! (Javanews)
