Kuvendi i Kosovës është mbledhur sot në një seancë të jashtëzakonshme, e cila përbën dhe përpjekjen e tretë për kalimin e marrëveshjes së demarkacionit.
Ndryshimi me dy përpjekjet e mëhershme, të cilat dështuan për shkak të mospajtimeve të mëdha mes forcave politike, është se këtë radhë është arritur konsensusi mes partive shqiptare në pushtet dhe LDK-së. Megjithatë, as kjo nuk duket e mjaftueshme për arritjen e 80 votave të nevojshme që ujdia të marrë dritën jeshile të Kuvendit.
Që të sigurohet numri i nevojshëm, duhen të paktën edhe dy vota. Ato po kërkohen brenda grupit parlamentar të Vetëvendosjes ose Listës Serbe, pjesë e koalicionit qeverisës, por që deri tani e ka kundërshtuar demarkacionin. Vetëvendosja, pavarësisht përçarjeve, paralajmëron një votë kundër, ndërsa Lista Serbe thotë se çdo gjë do të varet nga takimet në kuadër të dialogut të Brukselit, ku temë diskutimi të martën ka qenë edhe krijimi i asociacionit të komunave me shumicë serbe.
Vota në Kuvend vjen në ditën kur Prishtinën e viziton treshja e fuqishme e Bashkimit Europian: Presidenti i KE-së, Jean-Claude Juncker, shefja e diplomacisë Federica Mogherini dhe Komisioneri i Zgjerimit, Johannes Hahn.
Ratifikimi i demarkacionit me Malin e Zi është kushti që Kosova duhet ta përmbushë në mënyrë që qytetarët e saj të mund të udhëtojnë lirshëm në zonën Shengen. Vetëvendosja është kundër paktit sepse mendon që përmes tij, vendi po humbet territor.
Kryetari i Parlamentit të Kosovës, Kadri Veseli u shpreh një ditë më parë se është i bindur se demarkacioni do të kalojë në Kuvend.
