Dy ditë më parë u raportua për vendosjen e njësive elitare të policisë malazeze në kufirin me Kosovën, respektivisht, u raportua për vendosjen e pjesëtarëve specialë të njësitit anti-terrorist.
Sipas medieve malazeze, kjo masë radikale e ndërmarrë nga Podgorica vjen si pasojë e frikës nga përleshjet pas ratifikimit eventual të demarkacionit më 1 shtator në Kuvendin e Kosovës.
“Vijesti”, gazeta më e madhe në Mal të Zi dhe e afërt me pushtetin atje, raportoi se të martën në kufirin me Kosovën përveç njësisë anti-terroriste, aty u vendosen edhe mitraloz.
Sipas burimeve të besueshme të “Vijestit”, më 23 gusht, 30 pjesëtarët të SAJ-it, të armatosur me armë të gjatë kanë patrulluar brezin kufitar.
Këto burime kanë thënë se pjesëtarët e SAJ-it ishin udhëhequr nga komandanti Mirko Banovic dhe zëvendësi i tij, Milan Kovaçevic. Ata kishin qëndruar tërë ditën në kufi dhe më pas ishin kthyer në Podgoricë.
“Vendimi që pjesëtarët e njësisë anti-terror të patrullojnë në brezin kufitar është marrë nga krerët e shtetit malazez, pasi kishin marrë informacione nga shërbimet e sigurisë se situata mund të perkeqesohet për shkak të marrëveshjes së demarkacionit me Malin e Zi”, shkruan “Vijesti”, transmeton lajmi.net.
Tutje kjo gazetë shkruan se pas kontrollit, është hartuar plani, sipas të cilit, në rast të nevojës, SAJ dhe Njësia e Veçantë policore do të stacionoheshin në kufirin me Kosovën.
Sipas informacioneve jozyrtare, specialët malazezë kishin në plan t’i kontrollonin edhe veturat e KFOR-it të cilat nga Kosova hynin në Mal të Zi./a.m.
