DEMARKACIONI/ Çfarë do të ndodhë më 1 Shtator në Kosovë?!

Nga Ben Andoni

Vetë kosovarët janë shumë konfuzë për t’iu përgjigjur kësaj pyetje. De jure, të gjithë janë kundër dhunës, por de facto pretendojnë se do ketë dhunë dhe provokime të dyanshme. Në orët e fundit, madje është thënë nga policia se nuk ka leje për protestë nesër. Kjo ka bërë që të vijojnë akuzat: Maxhoranca e vendos gishtin e fajtorit tek Vetëvendosja, kurse kjo e fundit tek vija e qeverisë dhe parashikon provokimet e policisë. Kjo e fundit, pak orë më parë, ka arrestuar disa anëtarë të Vetëvendosjes madje u ka gjetur edhe armë në shtëpi, që tashmë kanë dalë se u përkasin familjarëve të tyre!

Lajmi i mirë për qeverinë është se Opozita në këtë protestë është e ndarë dhe ndërsa Vetëvendosja ka vendosur të lëshojë të gjithë bateritë e saj në këtë protestë, AAK-ja dhe Nisma e kundrojnë nga larg, edhe pse mbesin tejet kundërshtuese për Demarkacionin.

Protesta që do të fillojë më 11.00, pritet të jetë në formë paqësore, por liderët e Vetëvendosjes kanë paralajmëruar se do bëjnë çmos, që të mos e lejojnë votimin për Demarkacionin, çka do të thotë se tremben nga numrat që ka qeveria, por edhe se do bëjnë trazira në parlament. Që të kalojë miratimi i Demarkacionit në parlamentin kosovar duhen 80 vota, ndërkohë që koalicioni qeverisës i ka 90 deputetë. Ka disa njoftime nga individë të veçantë të dy partive kryesore në vend që nuk do të votojnë por numri i tyre nesër do të tregojë realisht sesa Kosova do të jenë në gjendje të përballë këtë realitet. Ata që e kundërshtojnë tashmë Demarkacionin janë të shumtë nga shtresat sociale dhe për fat të keq të qeverisë janë dhe anëtarë të parlamentit nga dy partitë kryesore drejtuese, PDK-ja dhe LDK-ja.

Nga mënyra sesi janë shprehur njerëzit e Vetëvendosjes se do ketë provokime dhe se ata vazhdimisht gjenden në këtë realitet, atëherë duhet të presim rrëmujë. Vetëvendosja pretendon bllokim paqësor, por kjo është e pamundur po të dëgjosh premtimet e krerëve të Kosovës, që janë të bindur se nesër lajnë duart me Demarkacionin. Që do të thotë votim i siguruar: Pro.

Ndërkohë i gjithë faktori ndërkombëtar në Kosovë është investuar për votimin e Demarkacionit, shtuar këtu me të gjitha vizitat e nivelit të lartë të ardhur në ditët e fundit. Votimi për demarkacionin dhe pak më vonë për Asosiacionin do t’i hapë udhë Kosovës për viza. Një element që s’është aspak i vërtetë, sipas Reuters, pasi edhe pse aleatët perëndimorë i kanë thënë Kosovës se qartësimi i kufijve me fqinjët që ishin pjesë të ish-Jugosllavisë, përfshirë Malin e Zi, është parakusht për aderimin me Bashkimin Evropian, në veçanti marrjen e liberalizimit të vizave, vëmendja e sotme ka rrëshqitur drejt Gjeorgjisë dhe Turqisë.

Një gjë disi periferike, e cila mund ta ndihë për zhvillimin e votimit maxhorancën, është se dy forcat e opozitës AAK-ja dhe Nisma për Kosovën kanë thënë se kundërshtimin e tyre për Demarkacionin do të shprehin me vota dhe vetëm në Kuvend, por jo edhe në protestën e organizuar nga Lëvizja Vetëvendosje, çka e dobëson disi protestën.

Ndërkohë, megjithë argumentet e njerëzve të shkencës, autoriteti politik kosovar nuk i ka marrë ato parasysh fare ose më keq akoma i ka futur në hulli politike. Tryeza e pak ditëve më parë, që mblodhi të gjithë faktorët e Demarkacionit, përfundoi në turp dhe me mosmarrëveshje edhe më të mëdha sesa ishin më parë palët.

Por, ndërsa Kosova ka probleme shumë më të mëdha se Demarkacioni, e gjithë dita e nesërme do të jetë pasqyrë e asaj që do të ndodhë në Kosovë në ditët në vazhdim. Për hir të së vërtetës, prognoza nuk është aspak e mirë dhe kjo përbën trishtimin më të madh, për një vend kaq të ri dhe që nuk e gjen dot më konsensusin për asgjë.

Demarkacioni shumë mirë dhe mund të shtyhej, ashtu si këtë problem e mbartin ende i disa vendeve ballkanase mesveti prej vitesh, pa cenuar integritetin e vendit. (Javanews)