Kërkesa e Kosovës për të qenë mysafire speciale në Komitetin për Çështje Politike dhe Demokraci të Asamblesë Parlamentare të Këshillit të Evropës u hoq nga rendi i ditës, konfirmoi delegacioni i Kosovës pranë KiE-së.
Kjo kërkesë ishte në rendin e ditës së takimit të Komitetit, i cili u mbajt në Paris.
Nënkryetarja e Kuvendit të Kosovës, Saranda Bogujevci, pjesë e delegacionit të Kosovës, tha se pika e rendit të ditës u shty me kërkesë të deputetit Pablo Hispan, duke shtuar se “procesi më i rëndësishëm është anëtarësimi [në Këshillin e Evropës]; ndryshimi i statusit është procedurale dhe i përcaktuar me rregulla të Asamblesë”.
“Është për keqardhje që një shtet e prezanton arritjen e një çështjeje që fare nuk lidhet me ta, për beteja të tyre politike të brendshme siç ka bërë sot Serbia”, shkroi ajo në Facebook.
Pablo Hispan është kryetar i Grupit të Partisë Popullore Evropiane.
E pyetur nga Radio Evropa e Lirë se cila ishte arsyeja e dhënë nga Hispan për shtyrjen, Bogujevci tha se nuk kishte një arsye konkrete.
Anëtarja tjetër e delegacionit të Kosovës, Ariana Musliu Shoshi, e cilësoi këtë si “një zhvillim të papritur”.
“Kjo situatë tregon nevojën për mobilizim si shtet, në bashkëpunim me aleatët tanë, për të krijuar një strategji të qartë që do të sigurojë realizimin e prioriteteve dhe agjendave tona në arenën ndërkombëtare”, shkroi ajo në Facebook.
Më herët, për një gjë të tillë raportoi edhe kryetarja e Kuvendit të Serbisë, Ana Bërnabiq.
Gjatë seancës së Kuvendit të Serbisë, ajo tha se është njoftuar nga shefja e delegacionit serb në Asamblenë Parlamentare të Këshillit të Evropës, Bilana Pantiq.
“Mirënjohje e madhe për miqtë tanë nga Spanja, mirënjohje e madhe për miqtë tanë nga Partia Popullore Evropiane (EPP), të cilët na ofruan mbështetje në mënyrë që ta kishim shumicën për të arritur ta heqim këtë pikë nga rendi i ditës i Komitetit politik të Asamblesë Parlamentare të Këshillit të Evropës”, tha Bërnabiq.
Të pranishëm në takimin e sotëm ishin edhe deputetë të tjerë të Kuvendit të Kosovës, përfshirë Besnik Tahirin dhe Arben Gashin.
Radio Evropa e Lirë është përpjekur t’i kontaktojë për të marrë detaje të tjera për këtë çështje, por ata nuk kanë qenë të qasshëm.
Gjithashtu, Radio Evropa e Lirë i është drejtuar edhe Ministrisë së Punëve të Jashtme të Kosovës për këtë çështje dhe është në pritje të përgjigjes.
Asambleja Parlamentare mund t’i japë statusin e mysafirit të veçantë parlamenteve kombëtare të vendeve evropiane që nuk janë shtete anëtare, por të cilat kanë aplikuar për anëtarësim në Këshillin e Evropës.
Anëtarët e delegacionit të mysafirit special mund të ulën në Asamblenë Parlamentare, por nuk kanë të drejtë vote. Ata kanë të drejtë të mbajnë fjalim me leje të presidentit të Asamblesë.
Kosova dështoi të anëtarësohet në Këshillin e Evropës në fillim të vitit 2024, për shkak se u kushtëzua me krijimin e Asociacionit të komunave me shumicë serbe në Kosovë.
Vitin e kaluar, Serbia kishte formuar grup punues për koordinimin e aktiviteteve të autoriteteve shtetërore kundër pranimit të Kosovës në Këshillin e Evropës.
Këshilli i Evropës është organizatë lidere në mbrojtjen e të drejtave të njeriut. Anëtarësimi eventual do t’i ndihmonte Kosovës, mes tjerash, në fushën e sundimit të ligjit, dhe luftimin e korrupsionit.
