Diplomatja Yuri Kim, që është propozuar nga Presidenti amerikan Donald Trump për ambasadore në Tiranë ka dalë sot në një seancë dëgjimore para Komisionit të Jashtëm të Senatit.
Kim është shprehur para anëtarëve të Senatit se nëse do marrë aprovimin do të ndihmojë Shqipërinë në vijimin e reformave.
Youri Kim shprehet se Shtetet e Bashkuara të Amerikës mbështesin ngritjen e SPAK dhe të BKH në vendin tonë.
“Duhet të ndihmojmë Shqipërinë të ndërtojë institucione demokratike për ti bërë ballë rrezikut rus. Do të inkurajojmë Shqipërinë në reformat e ndërmara“, ka deklaruar Yuri Kim.
Diplomatja u fokusua në tre pika kryesore sa i përket objektivave të saj si ambasadore në Tiranë.
“Fillimisht, do të inkurajoj Shqipërinë të vijojë me kursin e qëndrueshëm për të arritur në 2% të investimeve të mbrojtjes deri në vitin 2024, që kështu Shqipëria të jetë edhe më e fuqishme dhe e aftë si aleate.
“Së dyti, do të vazhdoj të promovoj zhvillimin demokratik të Shqipërisë. Në terma të menjehërshëm, unë do të shtyj drejtuesit e Shqipërisë për të zgjidhur ngërçin aktual politik në një mënyrë që përforcon kërkesën e pranimit të Shqipërisë në BE.
Së treti, do të punoj për të promovuar eksportet dhe investimet amerikane në Shqipëri në mënyrë që të sigurohen mundësi për qytetarët e SHBA-së dhe Shqipërisë, si dhe të krijohen vende pune në të dyja shtetet”, deklaroi Kim.
Që prej majit të 2018-ës, Ambasada e SHBA në Tiranë nuk ka një drejtues, pas largimit të ambasadorit Donald Lu, ndërkohë që aktualisht ambasada amerikane në Shqipëri drejtohet nga zv/ ambasadorja, e ngarkura me punë Leyla Moses Ones.
g.kosovari
