Duket se nuk ‘pi më ujë’ metoda që trafikantët e drogës kishin gjetur për të marrë drogë nga SHBA, përmes postave në kryeqytet.
Tri ditë pas arrestimit një të riu nga Italia që studionte në Tiranë, i cili u kap duke trafikuar lëndë narkotike që e merrte me postë dhe që i vinte nga SHBA, sot është goditur një tjetër rast.
Policia bën me dije se seksioni për Hetimin e Narkotikëve, në bashkëpunim me Forcën e Posaçme Operacionale të DVP Tiranë, Drejtorinë Vendore të Policisë Fier, Komisariatin e Policisë Rinas dhe Filialin Qendra Tranzite e Postës Shqiptare, në drejtimin e Prokurorisë, organizoi dhe finalizoi operacionin policor të koduar “Dërgesa 3”.
Si rezultat i operacionit u arrestua shtetasi A. M., 28 vjeç, banues në Fier.
Ky shtetas u kap në flagrancë nga shërbimet e Policisë, në një degë postare duke marrë një pako me rreth 135 gramë lëndë të dyshuar narkotike cannabis sativa me përqindje të lartë THC, që dyshohet se është trafikuar nga SHBA.
Materialet procedurale iu referuan Prokurorisë së Tiranës, për veprime të mëtejshme.
