Komisioni i posaçëm për procesin e dekriminalizimit ka përfunduar misionin e tij, duke rënë dakort për paketën e ndryshimeve kushtetuese që do t’i hapin rrugë dekriminalizimit.
Kreu i komisionit Oerd Bylykbashi tha se ndryshimet kushtetuese i japin liri ligjit për dekriminalizimin i cili pritet që përveç kandidimit të personave me precedentë penalë, të ndalojë edhe mandatet e atyre deputetëve të cilët kanë qenë dënuar më parë apo janë në procese gjyqësore në vende të huaja.
“Personat të cilët janë dënuar sipas këtij ndryshimi kushtetues do të jenë të kufizuar gjithashtu në ushtrimin e së drejtës për tu zgjedhur. Detajimin do ta bëjë ligji. Edhe personat të cilët ende nuk janë dënuar do të jenë subjekt i këtij ligji.
Persona të cilët janë të dëbuar me vendime gjyqësore nga vendet e BE për krime të rënda, pasi këta persona përbëjnë rrezik për këto vende; persona të cilët janë për ndjekje penale apo persona që janë dënuar me vendim jo përfundimtar në këto vende, me autorizim kushtetues nuk do të kenë të drejtën të kandidojnë apo ushtrojnë funksione për një kohë të caktuar.
Ne mendojmë që kjo paketë ndryshimesh kushtetuese të cilat autorizojnë zbatimin e ligjit, garanton që sot, që të gjithë shkelësve tu ndërpritet mandati si dhe të mos lejojë që persona të tjerë me precedentë të kandidojnë.”- tha Bylykbashi.
Në mbledhjen e shkuar të komisionit, më 23 nëntor palët politike arritën akordin për porpozimet që do të ndryshonin kushtetutën, duke i reduktuar ato nga 17 në 4 nene, në mënyrë që dokumenti themeltar i shtetit të mos cënohej nga ndryshimet.
