Këshilli i Rregullores dhe Mandateve ka nisur këtë mbrëmje diskutimin për aktet nënligjore të dekriminalzimit, ku aktualisht janë në tavolinë dy modele të prezantuara nga PS, variante të cilat për PD-në janë të papranueshme pasi nuk pasqyrojnë kërkesat e saj. I gjithë fokusi i diskutimeve po përqëndrohet në formularët e vetëdeklarimit dhe në hapësirën ligjore, nëse Këshilli Mandateve dhe rregullores ka tagrin ligjor për të kaluar aktet nënligjore të ligjit për dekriminalizimin.
Deputeti socialist Taulant Balla ka prezantuar dy formularë. I pari, dhe më i detajuari, përmban krimet për të cilat individë të caktuar nuk do të lejohen të kandidojnë për deputetë; ndërsa i dyti është varianti i ligjit Severino.
Ndërkohë, deputeti demokrat Oerd Bylykbashi ka mbrojtur variantin e PD për dekriminalizimin, që në parim nuk ka lidhje me atë të PS. Mes palëve ka një ndarje të thellë, që mund të vërë në pikëpyetje mundësinë e zbatimit të ligjit në fjalë.
Mes PD dhe PS nuk ka konsensus mbi atë se çfarë do të bëjë nesër Kuvendi; do të kalojë me një projektvendim sipas PD, apo sipas PS, që nuk përmban pjesën për prokurorinë.
PD thotë se, PS e ka hequr prokurorinë si mekanizëm kontrolli dhe kanë futur vetëdeklarimin e zyrtarëve. Vetë PD e ka bërë shumë të gjerë pjesën e kontrollit nga prokuroria. Konfliktualiteti mes palëve bën që rreziku që ligji i dekriminalizimit të dështojë të jetë i madh.
