Dekriminalizimi, mazhoranca debaton me opozitën
Komisioni për dekriminalizimin ka vijuar me debate ditën e sotme mes anëtarëve të mazhorancës dhe opozitës. Nënkryetari i komisionit, deputeti socialist Taulant Balla, tha se është e dukshme që opozita nuk kërkon të bashkëpunojë për të dalë me një vendim të përbashkët.
“Projekti juaj parashikon ndryshime kushtetuese dhe është në kundërshtim me Komisionin e Venecias. Projekti juaj anashkalon komisionin e dekriminalikzimit, – tha Balla. – Është e pamundur të punojmë për një variant të përbashkët me sa duket nga gatishmëria. Por rëndësi ka që të kemi vullnet politik. Projekti ynë është në përputhje me Komisionin e Venecias”.
Ndërkohë ka reaguar deputeti demokrat Eduard Halimi, i cili theksoi se Kuvendi ka nevojë për dekriminalizimin, duke cituar edhe kryeministrin Rama, i cili sipas tij ka thënë se “Parlamenti nuk ka të inkriminuar. Mazhoranca nuk mund ta marrë dot peng procesin e dekriminalizimit”.
Kryetari i Komisionit të dekriminalizimit, Oerd Bylykbashi, ka replikuar ndaj Ballës se procesi i dekriminalizimi do të çoher deri në fund, “ashtu siç kemi rënë dakord me Parlamentin Europian”.
Redaksia Java News/ f.g
