Deputeti i Partisë Socialiste Taulant Balla, i cili ka qenë negociator për gjetjen e konsensusit për Aktet Nënligjore të Dekriminalizimit ka dhënë një deklaratë për mediat ku ka folur mbi zhvillimet e sotme. Balla tha se Aktet u miratuan me konsensus në Komisionin e Mandateve, dhe pritet sipas tij t’i kalojnë për miratim seancës plenare. Balla tha se procesi ishte i vështirë, por u prodhua dokument i përbashkët.
“Ishte një proces sa i lehtë aq edhe i vështirë. Ne kishim gatishmërinë për ta kryer procesin. Këshilli i Mandateve i ka miratuar aktet nënligjore. Ka një dokument të përbashkët, kjo është e rëndësishme. Materiali i Akteve Nënligjore i kalon seancës”, tha Balla.
Ndërkohë, deputetja Mesila Doda ka reaguar në lidhje me zvarritjen që sipas saj po i bëhet procesit për miratimin e akteve nënligjore për dekriminalizimin. Ajo ka dhënë një deklaratë për mediat në hyrje të sallës së Kuvendit ku i ka bërë thirrje palëve të mos e mbajnë procesin peng, por të gjejnë gjuhën e përbashkët në të mirë të Shqipërisë. Vendi sipas saj ka nevojë urgjente për largimin e të inkriminuarve.
“Shpresoj shumë të mos mbetet peng procesi. Për të mirën e Shqipërisë duhet të gjejmë gjuhën e përbashkët. Ajo që po ndodh është një tërheqje zvarrë. Deputetët po presin që thjesht të fillojë diskutimi dhe votimi i këtyre akteve dhe amendamenteve”, tha deputetja Doda.
